وەزارەتی دەرەوەی فەرەنسا سەرکۆنەی شه‌ر و ئالۆزیه‌كانی كه‌ناراوه‌كانی سووریا دەکات. 

وەزارەتی دەرەوەی فەرەنسا سەرکۆنەی كوشتنی عه‌له‌وییه‌كانی سووریا دەکات. 

شەممە 8ـی ئاداری 2025، ئاژانسی فرانس پرێس بڵاوی كرده‌وه‌، وەزارەتی دەرەوەی فەرەنسا  ئیدانه‌ی کوشتنی هاووڵاتیانی عەلەوی له‌ سووریا كردووه‌ و ڕایگەیاندووه‌، نابێت بەهۆی بیروڕای ئایینی و سیاسییه‌وه‌ هیچ کەسێك بکوژرێت.

هەروەها داوای لە دەسەڵاتدارانی نوێی سووریا کرد، بەبێ لایەنگیری ده‌ست به‌ لێکۆڵینەوەکان دەست پێ بکەن و ئەوانەی بەرپرسن بە سزای خۆیان بگەن. 

ئه‌مه‌ش له‌ كاتێكدایه‌ كه‌ رۆژی پێنجشه‌ممه‌، 6ـی ئاداری 2025، شه‌ڕ و پێکدادان لەنێوان هێزە ئەمنییەکان و پاشماوه‌كانی ڕژێمی پێشووی به‌شار ئه‌سه‌د لە پارێزگای لازقیە كه‌ زۆرینه‌ی دانیشتووانه‌كه‌ی عه‌له‌وین ڕووی دا و دواتر پێكدادانه‌كان جه‌بله‌ و بانیاس و ناوچەکانی دیکەی دەوروبەری ناوچە عەلەوییەکانی گرته‌وه‌ و ژماره‌یه‌كی زۆریان بوونه‌ قوربانی.

شەممە 8ـی ئاداری 2025، ڕوانگەی سووری بۆ مافەکانی مرۆڤ بڵاوی كرده‌وه‌، لە دوو ڕۆژی شەڕ و پێکدادانەکاندا ژمارەی كوژراوان بۆ 600 کەسی مه‌ده‌نی بەرز بووەتە.