ئەو دوو هاووڵاتییە عێراقییەی لە ئێران رفێنرابوون، ئەمڕۆ پێنجشەممە لەلایەن هێزە ئەمنییەكانەوە ئازادكران، بەڵام رفێنەرەكان تا ئێستا دەستگیرنەكراون.
رۆژی سێشەممەی رابردوو دوو هاووڵاتی عێراقی بە مەبەستی چارەسەری پزیشكی دەچنە پارێزگای خوزستان، بەڵام لەوێ لەلایەن چەند كەسێكەوە دەرفێنرێن.
تۆمەتبارەكان پەیوەندییان بە كەسوكاری رفێنراوەكان كردبوو لە عێراق و بە مەبەستی ئازادكردنیان داوای بڕی 35 هەزار دۆلاریان كردبوو.
ئەمڕۆ پێنجشەمە داواكاری گشتیی پارێزگای خوزستان ئاشكرای كرد كە دوای 72 كاتژمێر لە رووداوەكە، هێزە ئەمنییەكان توانیویانە هەردوو هاووڵاتییە عێراقییەكە ئازاد بكەن.
ئاشكراشی كرد كە تا ئێستا رفێنەرەكان دەستگیرنەكراون، بەڵام هێزە ئەمنییەكان بەدوایانەوەن بۆ ئەوەی دەستگیریان بكەن.
کۆمێنت (0)
تا ئێستا هیچ کۆمێنتێک نەکراوە.