میدیاكانی سووریا ئاشكرایان كرد، ماهیر ئەسەد برای بەشار ئەسەد سەرۆكی سووریا چەند رۆژێك پێش ئێستا وڵاتی جێھێشتووە و بەرەو شوێنێكی نادیار رای كردووە.
ماهیر ئەسەد كە یەكێكە لە فەرماندە سەربازییە باڵاكانی سووریا و فەرماندەی هێزی چوار و پاسەوانە تایبەتەكانی براكەی بەشار ئەسەد بوو، 3 رۆژ پێش كەوتنی دیمەشق، خاكی سووریای جێهێشتووە.
ماهیر ئەسەد دوایین دەركەوتنی 3 رۆژ بەر لە ئێستا بووە كە بەشداری كۆبوونەوەیەكی تایبەتی سەربازی لەگەڵ وەزیری بەرگری سووریا كردووە، لە دوای ئەم كۆبوونەوەیە لە هیچ شوێنێك نەبینراوە.
ئەمڕۆ یەكشەممە دوای كەوتنی دیمەشقی پایتەخت و رووخانی رژێمی بەشار ئەسەد، گرووپە چەكدارەكان سەرجەم ماڵ و شوێنە تایبەتەكانی ماهیر ئەسەدیان پشكنی بوو، بەڵام هیچ زانیارییەكیان لەبارەوە دەست نەكەوتبوو.
لەلایەكی دیكەوە كۆشكی كرملین ئەمشەو یەكشەممە ئاشكرای كرد كە بەشار ئەسەد و ئەندامانی خێزانەكەی گەیشتوونەتە رووسیا و بە هۆكاری مرۆیی مافی پەنابەرییان پێ بەخشراوە.
کۆمێنت (0)
تا ئێستا هیچ کۆمێنتێک نەکراوە.