كەمێك پێش ئێستا كۆبوونەوەی سەرۆك وەزیرانی عێراق لەگەڵ ئەنجوومەنی نوێنەرانی عێراق كۆتایی هات و بەهەمانشێوە دانیشتنی ئەمڕۆ چوارشەممەی پەرلەمانیش كۆتایی هات.
پەیامنێری (كوردستان تیڤی) لە بەغدا پێی راگەیاندین: كەمێك پێش ئێستا محەمەد شیاع سوودانی سەرۆك وەزیرانی عێراق كۆتایی بە كۆبوونەوەكەی ئەمڕۆی لەگەڵ پەرلەمانی عێراق هێنا و هەروەها باڵەخانەی پەرلەمانیشی جێهێشت.
راشیگەیاند: كۆبوونەوەكە داخراو بوو و دوور لە چاوی كامێراكان بەڕێوەچوو.
هەروەها رایگەیاند: لە كۆبوونەوەكەدا محەمەد شیاع سوودانی بەوپێیەی فەرماندەی گشتیی هێزە چەكدارەكانی عێراقە، پلان و ئامادەكارییەكانی سوپای عێراقی خستەڕوو بۆ رووبەڕووبوونەوەی هەر هێرش و مەترسییەك ئەگەر لە سووریا و گرووپە چەكدارەكان بكرێتە سەر عێراق.
پەیامنێرمان لە بەغدا ئاماژەی بەوەش دا، هەر لە كۆبوونەوەكەدا سەرۆك وەزیرانی عێراق چەند بابەتێكی دیكەی سەبارەت بە بەرنامەكانی حكوومەت و رێژەی جێبەجێكردن و ئەنجامدانی بەرنامەكانی بۆ سەرۆكایەتی پەرلەمان و ئەندامان خستەڕوو.
هەریەك لە فوئاد حوسێن وەزیری دەرەوە و محەمەد تەمیم وەزیری پلاندانان و عەبدولئەمیر شەمەری وەزیری ناوخۆ، یاوەری محەمەد شیاع سوودانی بوون لە كۆبوونەوەكەی ئەمڕۆی پەرلەمان.
کۆمێنت (0)
تا ئێستا هیچ کۆمێنتێک نەکراوە.