نوێنەری تایبەتی سكرتێری گشتیی نەتەوەیەكگرتووەكان پیرۆزبایی لە گەلی عێراق كرد بەبۆنەی بەڕێوەچوونی پڕۆسەی سەرژمێری گشتیی دانیشتووان و رایگەیاند، پێشكەوتنی هەموو وڵاتێك لە سەرژمێرییەوە بەدەست دێت.
ئەمڕۆ چوارشەممە محەمەد ئەلحەسان نوێنەری تایبەتی سكرتێری گشتیی نەتەوەیەكگرتووەكان بە یاوەری محەمەد شیاع سوودانی سەرۆك وەزیرانی عێراق و وەزیری پلاندانانی عێراق، سەردانی ژووری عەمەلیاتی بەڕێوەچوونی سەرژمێری گشتیی دانیشتووانیان كرد.
محەمەد ئەلحەسان لە سەردانەكەدا وتەیەكی پێشكەش كرد و رایگەیاند: پیرۆزبایی لە گەلی عێراق دەكەم بەبۆنەی بەڕێوەچوونی یەكەم سەرژمێری گشتی دانیشتووان بەشێوەیەكی رێكوپێك و ئەلیكترۆنی دوای 37 ساڵ.
راشیگەیاند: ئەمڕۆ عێراق بە قۆناغێكی مێژوویی تێپەڕ دەبێت بەتایبەت كە ئەم سەرژمێرییە بۆ ئامانجی گەشەپێدانە، بەدڵنیایشەوە پێشكەوتنی سەرجەم وڵاتان بە پلەی یەكەم لە رێگەی سەرژمێرییەوە ئەنجام دەدرێت.
هەروەها رایگەیاند: بەناوی نەتەوەیەكگرتووەكانەوە پیرۆزباییتان لێ دەكەم و هیوای سەركەوتن و عێراقێكی باشترتان بۆ دەخوازم.
لە بەیانی ئەمڕۆ چوارشەممە لە هەرێمی كوردستان و سەرجەم پارێزگاكانی عێراق دەست بە قۆناغی دووەمی پڕۆسەی سەرژمێری گشتیی دانیشتووان كرا و بڕیارە سبەی پێنجشەممەش پڕۆسەكە بەردەوام بێت.
کۆمێنت (0)
تا ئێستا هیچ کۆمێنتێک نەکراوە.