گوته‌بێژی حكوومه‌تی عێراق ده‌ڵێت: په‌یوه‌ندییه‌كانی عێراق له‌گه‌ڵ ئه‌مه‌ریكا، به گوێره‌ی گۆڕانی ئیداره‌كانی ئه‌و وڵاته ده‌گۆڕێت .
باسم عه‌وادی، گوته‌بێژی حكوومه‌تی عێراق، دوێنی تایبه‌ت به كه‌ناڵی الجزیرة ڕایگه‌یاند، عێراق ڕۆڵی نێوه‌ندگیریی لێكنزیكبوونه‌وه و دانانی سنوورێك له نێوان تاران واشنتون ده‌گێڕێت، ته‌نانه‌ت به‌غدا له توانایدایه سه‌باره‌ت به ئاگربه‌ستی غه‌ززه و لوبنان، قسه له‌گه‌ڵ تاران و واشنتون بكات.
سه‌باره‌ت به گرژی و ململانێكانی نێوان سوپای ئیسرائیل له‌گه‌ڵ هه‌ر یه‌ك له بزووتنه‌وه‌ی حه‌ماسی فه‌ڵه‌ستینی و حزبوڵلای لوبنانی باسم عه‌وادی گوتی، پێویسته ئاگربه‌ست ڕابگه‌یه‌ندرێت.
هاوكات له باره‌ی به‌ره‌ی موقاوه‌مه‌ی عێراقـی و كاردانه‌وه‌كانی له به‌رانبه‌ر شه‌ڕی ئیسرائیل له‌گه‌ڵ حه‌ماس و حزبوڵلا گوتی، له هه‌ستی به‌ره‌ی موقاوه‌مه تێ ده‌گه‌ن، به‌ڵام ئه‌ركی حكوومه‌تی عێراق بریتییه له به‌رگریكردن له سه‌روه‌ری و سه‌ربه‌خۆییه‌كه‌ی، هاوكات كار ده‌كه‌ن بۆ ئه‌وه‌ی بۆچوونه كه‌سییه‌كان و كاردانه‌وه‌كانیان كۆنترۆڵ بكه‌ن.
کۆمێنت (0)
تا ئێستا هیچ کۆمێنتێک نەکراوە.