ئەمڕۆ چوارشەممە دوای راگەیاندنی سەركەوتنی دۆناڵد ترەمپ لە هەڵبژاردنەكانی سەرۆكایەتی ئەمەریكا، نرخی نەوت و زێڕ لە بازاڕەكانی جیهان رووی لە دابەزین كرد.
ئەم دابەزینە بەهۆی ئەوەوەیە كە وەبەرهێنەران پێیانوایە ئیدارەی دۆناڵد ترەمپ كار لەسەر بەهێزكردنەوەی بەهای دۆلار و پاڵەپەستۆخستنە سەر وڵاتی چین دەكات كە گەورەترین كڕیای نەوت لەسەر ئاستی جیهان.
پێش نیوەڕۆی ئەمڕۆ چوارشەممە لەگەڵ راگەیاندنی ئەنجامەكانی هەڵبژاردنی سەرۆكایەتی ئەمەریكا و سەركەوتنی ترەمپ، راستەوخۆ نرخی نەوت لە بازاڕكانی جیهان دابەزینیان بەخۆیانەوە بینی.
هەر بەرمیلێك نەوتی خاوی برێنت بە بڕی 1.04 دۆلار دابەزی و بووە 74.49 دۆلار، بەهەمانشێوە نرخی نەوتی خاوی تێكساسی ئەمەریكیش 1.04 دۆلار دابەزی و و ئێستا هەر بەرمیلێك بە 70.95 دۆلار مامەڵەی پێوە دەكرێ.
لەگەڵ دابەزینی نرخی نەوت، سەركەوتنی دۆناڵد ترەمپ هەروەها نرخی زێڕیشی لەسەر ئاستی جیهان دابەزاند، بۆ نموونە هەر مسقالێك زێڕی عەیار 21 لە شاری هەولێر 15 هەزار نرخەكەی دابەزی و ئێستا بە 575 هەزار دینارە.
ئەمڕۆ چوارشەممە ئەنجامەكانی هەڵبژاردنی سەرۆكایەتی ئەمەریكا راگەیەنرا و تێیدا دۆناڵد ترەمپ بەربژێری كۆمارییەكان بە بەدەستهێنانی زیاتر لە 71 ملیۆن دەنگ و 277 كورسی ئەنجوومەنی نوێنەران، سەركەوتنی بەسەر ركابەرەكەی كامالا هاریس بەربژێری دیموكراتەكان بەدەستهێنا كە زیاتر لە 66 ملیۆن دەنگ و 224 كورسی ئەنجوومەنی نوێنەرانی بەدەستهێنابوو.
کۆمێنت (0)
تا ئێستا هیچ کۆمێنتێک نەکراوە.