لە سەرەتای هێرشەكانی ڕووسیا، ژمارەی دانیشتووانی ئۆکرانیا بە نزیکەیی 8 ملیۆن کەس کەمی کردووە بەهۆی ئاوارەبوونی بەرفراوانی دانیشتووان و دابەزینی بەرچاوی ڕێژەی لەدایکبوون لەو وڵاتەدا.
فلۆرانس پاوەر بەڕێوەبەری بەشی ئەوروپای ڕۆژهەڵات و ئاسیای ناوەڕاست لە سندووقی دانیشتووانی نەتەوەیەکگرتوەکان لە كۆنگرەیەكی ڕۆژنامەوانیدا ڕایگەیاند: هەرچەندە لەم ماوەیەدا هیچ سەرژمێرییەکی دانیشتووان لە ئۆكڕاینا ئەنجام نەدراوە، بەڵام چەند پێوەرێک دەریدەخەن کە ژمارەی دانیشتووانی ئەو وڵاتە بە شێوەیەکی بەرچاو کەمی کردووە.
راشیگەیاند: خەمڵاندنەکان دەریدەخەن کە ژمارەی دانیشتووانی ئێستای ئۆکڕاینا بەراورد بە ساڵی 2014 نزیکەی 10 ملیۆن کەس کەمی کردووە، هەروەها لە دوای لەشکرکێشی سەربازیی ڕووسیاش نزیکەی 8 ملیۆن کەسی دیكە کەمی کردووە.
هەروەها رایگەیاند: ئۆكڕاینا بەشێوەیەكی گشتی لە ڕووی ژمارەی دانیشتووانەوە ئێستا بەرەو پیربوون دەچێت، چونكە رێژەی لەدایكبوونی منداڵان زۆر كەمە، هەروەها نزیكەی 6 ملیۆن و 700 هەزار هاوڵاتییانی ئۆكراینی وڵاتەكەیان بەجێهێشتووە و ئاوارە بوونە، جیا لەوەش دەیان هەزاری دیكە لە جەنگی بەرامبەر رووسیا كوژراون.
کۆمێنت (0)
تا ئێستا هیچ کۆمێنتێک نەکراوە.