سێرگی لاڤرۆڤ، وەزیری دەرەوەی ڕووسیا لە میانی بەشداریكردن لە گفتوگۆی ستراتیژی نێوان ڕووسیا و ئەنجوومەنی هاریکاری کەنداوی عەرەبی لە سعودیە ڕایگەیاند، کۆمەڵگەی نێودەوڵەتی بێتوانایه له‌به‌رامبه‌ر ڕاگرتنی شەڕ لە کەرتی غەززە و کوژرانی هاووڵاتیانی سڤیل، گوتیشی، ئه‌گه‌ر ئاگربه‌ستی به‌په‌له ڕانه‌گه‌یه‌نرێت ئه‌وا بارودۆخی سەربازی و سیاسی له ناوچه‌كه‌دا به‌ره‌و گرژییه‌كی ئاڵۆزتر ده‌چێت و ڕه‌نگه شه‌ڕی ناوچه‌یی هه‌ڵگیرسێت.
هه‌روه‌ها لاڤرۆڤ ئاماژەی بەوەشكرد، ڕووبەڕووبونەوەی ئیسرائیل و لوبنان گەیشتوەتە ئاستێکی مەترسیدار و ئەگەری هەیە شەڕه‌كە فراوانتربێت.
هاوكات لە میانی بەشداریكردن لە گفتوگۆی ستراتیژی، ڕووسیا و وڵاتانی ئەنجوومەنی هاریكاری كەنداو، هاوڕابوون لەسەر گرنگیدان به سەلامەتی گەشتە دەریاییە نێودەوڵەتییەکان و چارەسەرکردنی ئەو کێشەیە لە ڕێی سیاسی و دیپلۆماسیەوە.
لە ڕاگەیاندراوەكەی وەزارەتی دەرەوەی ڕووسیادا باس له‌وه‌شكراوه، ڕووسیا و وڵاتانی ئەنجومەنی هاریكاری كەنداو ڕێککەوتون كە خولی هەشتەمی گفتوگۆکانی نێوانیان لە ساڵی داهاتوودا لە ڕووسیا بەڕێوەبچێت.
کۆمێنت (0)
تا ئێستا هیچ کۆمێنتێک نەکراوە.