ئەمرۆ هەینی 4ی نیسان،ڕۆژنامه‌ی ته‌له‌گرافی به‌ریتانی له ڕاپۆرتێكیدا بڵاویكرده‌وه، ئێران فه‌رمانی كشانه‌وه‌ی كارمه‌نده سه‌ربازییه‌كانی له یه‌مه‌ن ده‌ركردوه و ده‌ستبه‌رداری هاوپه‌یمانه حوسییه‌كانی بووه، له كاتێكدا كه هه‌ڵمه‌تی ئاسمانی ئه‌مریكا له دژی ئه‌و گروپه چه‌كداره به‌رده‌وامه.
به گوته‌ی به‌رپرسێكی باڵای ئێرانیش، ئامانجی ئه‌م هه‌نگاوه دوركه‌وتنه‌وه‌یه له ڕووبه‌ڕووبونه‌وه‌ی ڕاسته‌وخۆ له‌گه‌ڵ ئه‌مریكا، هه‌روه‌ها تاران ئاشكرایكردووه كه ده‌ستیكردوه به كه‌مكردنه‌وه‌ی پشتیوانییه‌كانی بۆ حوسییه‌كان بۆ ئه‌وه‌ی سه‌رنجی ئه‌مریكا له‌سه‌ری لابدات.
به‌گوێره‌ی سه‌رچاوه‌كه نیگه‌رانی سه‌ره‌كی تاران ئێستا چۆنیه‌تی مامه‌ڵه‌كردنه له‌گه‌ڵ هه‌نگاو و بڕیاره‌كانی دۆناڵد تره‌مپ سه‌رۆكی ئه‌مریكا و كۆبونه‌وه ئه‌منییه‌كانیش له‌سه‌ر ئه‌م پرسه چڕكراوه‌ته‌وه. له‌دوای گفتوگۆكانی نێوان به‌رپرسانی ئیداره‌ی تره‌مپ سه‌باره‌ت به هێرشه ئاسمانییه‌كان، هێرشه‌كانی ئه‌مریكا بۆ سه‌ر حوسییه‌كان به‌رفراوانتر بووه، هه‌روه‌ها ئامانجه سه‌ربازییه سه‌ره‌كییه‌كانی له‌ناوبردوه و چه‌ند سه‌ركرده‌یه‌كیش كوژراون.
جێی ئاماژه‌یه، تره‌مپ فشاره‌كانی بۆ سه‌ر ئێران زیاد كرد بۆ گه‌ڕانه‌وه بۆ سه‌ر مێزی دانوستان سه‌باره‌ت به به‌رنامه ئه‌تۆمییه‌كه‌ی، هه‌ر له‌و چوارچێوه‌یه‌شدا فڕۆكه بۆمب هاوێژی B2 گواسته‌وه بۆ بنكه‌ی ده‌ریایی دیێگۆ گارسیای هاوبه‌شی ئه‌مریكا و به‌ریتانیا له زه‌ریای هیندستان.
کۆمێنت (0)
تا ئێستا هیچ کۆمێنتێک نەکراوە.