لەلایەن یەكێتی تۆپی پێی ئەوروپا ئەمڕۆ پێنجشەممە خەڵاتێكی تایبەت پێشكەشی كریستیانۆ رۆناڵدۆ ئەستێرەی پورتوگالی كرا لەبەرامبەر ئەو دەستكەوتانەی لەماوەی رابردوودا لە خولی یانە پاڵەوانەكانی ئەوروپا بەدەستی هێناوە.
سەرلەئێوارەی ئەمڕۆ پێنجشەممە لە شاری مۆناكۆی فڕەنسا تیروپشكی یارییەكانی خولی یانە پاڵەوانەكانی ئەوروپا (چامپیۆنس لیگ) بەڕێوەچوو، لە مەڕاسیمەكەدا خەڵاتەكە پێشكەشی رۆناڵدۆ كرا.
خەڵاتە تایبەتەكەی رۆناڵدۆ بریتی بوو لە گۆڵكاری مێژووی خولی یانە پاڵەوانەكانی ئەوروپا كە تاكە یاریزانە تا ئێستا توانیبێتی 140 گۆڵ لە 183 یاریدا تۆمار بكات لە ریزی هەریەك لە یانەكانی مانچستەر یونایتدی ئینگلیزی و ریال مەدریدی ئیسپانی و یۆڤێنتۆسی ئیتاڵی.
رۆناڵدۆی تەمەن 39 ساڵ، بە تۆماركردنی 11 گۆڵ لە پێشەوەی نزیكترین ركابەریتی كە لیۆنێل میسی ئەستێرەی ئەرجەنتینییە.
رۆناڵدۆ لە ماوەی ژیانی وەرزشیدا تا ئێستا حەوت جار خەڵاتی پێڵاوی زێڕینی وەك باشترین یاریزان لە خولی یانە پاڵەوانەكانی ئەوروپا پێدراوە، تاكە یاریزانیشە لە یەك وەرزی پاڵەوانیەتییەكەدا زۆرترین گۆڵی تۆماركردووە كە 17 گۆڵە بووە لە وەرزی 2013-2014، هەر لەو وەرزشدا لە 11 یاریی یەك لەدوای یەكدا گۆڵی تۆمار كردبوو.
رۆناڵدۆ تا ئێستا 5 جار جامی خولی یانە پاڵەوانەكانی ئەوروپای بەرزكردۆتەوە، جارێك لەگەڵ یانەی مانچستەر یونایتد و 4 جاری دیكەش لەگەڵ یانەی ریال مەدرید.
کۆمێنت (0)
تا ئێستا هیچ کۆمێنتێک نەکراوە.