ئەمڕۆ هەینی شا چارڵزی سێیەم شای بەریتانیا چاوی بە ریشی سۆناك كەوت و نامەی دەستلەكاركێشانەوەی لە سەرۆك وەزیرانی بەریتانیا پەسند كرد، دوای شكستەكەیان لە هەڵبژاردنی پەرلەمانی بەریتانیا.
ریشی سۆناك سەرۆكی پارتی پارێزگاران رایگەیاند، سەرلەبەیانی ئەمڕۆ هەینی لە كۆشكی باكینگهام چاوی بە شا چاڕڵز كەوتووە و بەفەرمی نامەی دەستلەكاركێشانەوەی لە پۆستی سەرۆك وەزیرانی بەریتانیا پێشكەش كردووە و لەبەرامبەردا ئەویش قبووڵی كردووە.
سۆناك راشی گەیاند كە بەهۆی شكستەكەیان لە هەڵبژاردنی گشتی بەریتانیا، لە داهاتوویەكی نزیكدا دەستبەرداری پۆستی سەرۆكی پارتی پارێزگارانیش دەبێت.
بەگوێرەی ئەنجامەكانی هەڵبژاردنی گشتی بەریتانیا، پارتی كرێكاران بە سەرۆكایەتی كیەر ستامەر سەركەوتنی گەورەی بەدەستهێناوە بە بردنەوەی 410 كورسی پەرلەمانی لە كۆی 650 كورسیدا.
لە هەڵبژاردنەكەدا پارتی پارێزگاران كە ماوەی 14 ساڵە پارتی دەسەڵاتدارە لە بەریتانیا، بە سەرۆكایەتی ریشی سۆناك شكستی گەورەی هێناوە و لە ریزبەندی دووەممە بە بەدەستهێنانی تەنیا 131 كورسی پەرلەمان.
بۆ پێكهێنانی حكوومەتی نوێی بەریتانیا هەر پارتێك پێویستی بە 326 كورسی پەرلەمانییە، بەڵام پارتی كرێكاران زۆر لەو رێژەیە زیاتری بەدەستهێناوە كە 410 كورسییە، بەمەش پۆستی سەرۆك وەزیران و پێكهێنانی حكوومەت لە ریشی سۆناك دەستێنێتەوە.
هەر دوای راگەیاندنی ئەنجامەكانی هەڵبژاردنەكانیش، سۆناك بەفەرمی دانی بە شكستی پارتەكەی لە هەڵبژاردنی پەرلەمانی بەریتانیا دانابوو و هەروەها بەرپرسیارەتی تەواوی شكستەكەشی لە ئەستۆ گرتبوو.
کۆمێنت (0)
تا ئێستا هیچ کۆمێنتێک نەکراوە.