میسی و هاوڕێكانی گەیشتنە یاریی پێش كۆتایی جامی كوپا ئەمەریكا

هەڵبژاردەی ئەرجەنتین خۆی گەیاندە قۆناخی پێش كۆتایی جامی كوپا ئەمەریكا دوای بردنەوەیان لە هەڵبژاردەی ئیكوادۆر بە لێدانی سزای یەكلاكەرەوە.

بەرەبەیانی ئەمرۆ هەینی هەڵبژاردەی ئەرجەنتین و ئیكوادۆر لەنێو یاریگەی (ئێن ئار جای) لە شاری هیوستنی ئەمەریكا رووبەڕووی یەك بوونەوە.

لە گێمی یەكەمی یارییەكەدا هەڵبژاردەی ئەرجەنتین گۆڵی پێشكەوتنی لە رێگەی لیساندرۆ مارتینێز لە خولەكی 35 تۆمار كرد، لە گێمی دووەمیشدا بەر لە تەواوبوونی یارییەكە لە خولەكی 92 رۆدیگێر گۆڵی یەكسانبوونەوەی بۆ هەڵبژاردەی ئیكوادۆر تۆمار كردەوە، گێمی زیادكراویش بەم ئەنجامە و بە یەكسانبوونی هەردوو هەڵبژاردە بە ئەنجامی 1-1 گۆڵ كۆتایی هات.

بۆ یەكلاكردنەوەی ئەنجامی یارییەكەش پەنا برایە بەر لێدانی سزای یەكلاكەرەوە، لیۆنێل میسی ئەستێرە و كاپتنی هەڵبژاردەی ئەرجەنتین لێدانێكی سزای بەهەدەر درا، لەبەرامبەریشدا یاریزانانی هەڵبژاردەی ئیكوادۆڕ لە دوو لێداندا گۆڵیان تۆمار نەكرد، بەم ئەنجامەش هەڵبژاردەی ئەرجەنتین بە ئەنجامی 4-2 گۆڵ سەركەوتنی تۆمار كرد و بەفەرمی گەیشتە قۆناغی پێش كۆتایی جامی كوپا ئەمەریكا.

هەڵبژاردەی ئەرجەنتین پاڵەوانی جیهان، لە ركابەرییەكانی ئەمساڵی جامی كوپا ئەمەریكا تا ئێستا ئاست و ئەنجامی باشی بەدەستهێناوە، لە 3 یارییدا 9 خاڵی بەدەستهێناوە.

هەڵبژاردەی ئەرجەنتین لە یاریی یەكەمیدا بە ئەنجامی 2-0 لە هەڵبژاردەی كەنەدای بردەوە، لە یاریی دووەمیشدا بە ئەنجامنی 1-0 لە هەڵبژاردەی چیلی بردەوە، دواتریش بەبێ میسی بەهەمان ئەنجامی یاری یەكەم شكستی بە هەڵبژاردەی پیرۆی هێنا.

هەڵبژاردەی ئەرجەنتین چاوی لەوەیە بۆ ئەمجارەش بەرگریی لە پاڵەوانبوون بكات و دووبارە جامی كوپا ئەمەریكا بەرز بكاتەوە دوای ئەوەی لە دوایین پاڵەوانیەتیدا لە ساڵی 2021 لەسەر حیسابی بەڕازیل جامەكەی بەرزكردبووەوە.