لە میانی یارییەکانی قۆناغی 16ی پاڵەوانێتی جامی نەتەوەکانی ئەورووپا بۆ تۆپی پێ، ھەڵبژاردەی سویسرا بە ئەنجامی 2-0 لە ھەڵبژاردەی ئیتاڵیای بردەوە و ھەروەھا ھەڵبژاردەی ئەڵمانیاش بە ئەنجامی 2-0 لە ھەڵبژاردەی دانمارک-ی بردەوە.
ھەر یەک لە ھەڵبژاردەکانی سویسرا و ئەڵمانیا گەیشتە قۆناغی چارەکی کۆتایی پاڵەوانێتی جامی نەتەوەکانی ئەورووپا بۆ تۆپی پێ و ھاوکات ھەریەک لە ھەڵبژاردەکانی ئیتاڵیا و دانمارک ماڵئاواییان لە پاڵەوانێتییەکەدا کرد.
دوێنێ شەممە لە میانی یارییەکانی قۆناغی 16ی پاڵەوانێتی جامی "یورۆی 2024"، ھەڵبژاردەی سویسرا و ھەڵبژاردەی ئیتاڵیا لە یاریگای ئۆڵۆمپی بەرلین ڕووبەڕووی یەکتر بوونەوە.
لە گیمی یەکەمی یارییەکەدا، یاریزانانی ھەڵبژاردەی سویسرا بەپێچەوانەی ئەوەی چاوەڕان دەکرا بەرامبەر بە یاریزانانی ئیتاڵیا بەھێز دەرکەوتن و لە خوڵەکی 37دا، یاریزانی ھەڵبژاردەی سویسرا، ڕیمۆ فرێلیێر گۆڵی یەکەمی تۆمار کرد و ھەڵبژاردەکەی پێشخست.
گێمی یەکەمی یارییەکە، بە ئەنجامی 1-0 لە بەرژەوەندی ھەڵبژاردەی سویسرا کۆتایی ھات.
لە گێمی دووەمی یارییەکەدا، یاریزانانی ھەڵبژاردەی سویسرا بە ھەمان سیناریۆی گێمی یەکەم دەستیان بە یاریکردن کرد و لە خولەکی 46دا یاریزانی ھەڵبژاردەکە، ڕوبێن ڤارگاس گۆڵی دووەمی تۆمار کرد.
یارییەکەیش بە ئەنجامی 2-0 لە بەرژەوەندی ھەڵبژاردەی سویسرا کۆتایی ھات.
ھەروەھا دوێنێ لە میانی یارییەکانی قۆناغی 16ی پاڵەوانێتی جامی "یورۆی 2024"، ھەڵبژاردەی ئەڵمانیا و ھەڵبژاردەی دانمارک لە یاریگای سیگناڵ ئیدونا پارک ڕووبەڕووی یەکتر بووەنەوە.
لە گێمی یەکەمی یارییەکەدا، یاریزانانی ھەڵبژاردەی ئەڵمانیا بە بەھێزی دەستیان پێکرد و چەندین ھێرشی مەترسیداریان بۆ تۆماکردنی گۆڵ لەدەستدا و دواتر یارییەکە بەھۆی نا لەباری کەشوھەواوە بۆ چەند خولەکێک وەستا و پاشان دەستی پێکردەوە و گێمی یەکەم بەبێ تۆمارکردنی گۆڵ کۆتایی ھات.
لە گێمی دووەمدا و لە 53دا یاریزانی ھەڵبژاردەی ئەڵمانیا، کای ھاڤێرتز بە لێدانی سزا ھەڵبژاردە کەی کردە خاوەنی گۆڵی یەکەم دواتر یاریزانی ھەڵبژاردەی ئەڵمانیا، جەمال موسیالا لە خولەکی 68دا، گۆڵی دووەمی تۆمارکرد.
یارییەکەیش بە ئەنجامی 2-0 لە بەرژەوەندی ھەڵبژاردەی ئاڵمانیا کۆتایی ھات.
بەو ئەنجامەش ھەڵبژاردەکانی سویسرا و ئەڵمانیا بۆ قۆناغی چارەکی کۆتایی پاڵەوانێتی جامی نەتەوەکانی ئەورووپا سەرکەوتن و ھاوکات ھەڵبژاردەکانی ئیتاڵیا و دانمارک ماڵئاواییان لە جامەکە کرد.
کۆمێنت (0)
تا ئێستا هیچ کۆمێنتێک نەکراوە.