جه‌مالی ده‌لاك ...
(كوا چى لێهات كۆڕى گه‌رمى ده‌مه و عه‌سرى لاى ئازيزان
كوا چريكه‌ى پڕ له‌سۆزى (حه‌مه قوتوو) و ده‌نگى (خه‌زان) (*1)
ڕۆژگارێك بوو له‌نێو باخچه‌كانى شارى هه‌ڵه‌بجه‌دا، ده‌نگ و چريكه و سه‌داى شاگرد و قوتابى قوتابخانه‌كه‌ى هونه‌رمه‌ندى گه‌وره سه‌يدعه‌لى ئه‌سغه‌رى كوردستانى، (عومه‌ر خه‌زان 1929 _12/1/2008) و هونه‌رمه‌نده شيكپۆش و ده‌م به‌خه‌نده و جوانخاسه‌كه‌ى هه‌ڵه‌بجه (حه‌مه قوتوو) به‌ده‌نگ و هونه‌ره به‌رزو هه‌ست بزوێنه‌كانيان شارى هه‌ڵه‌بجه و ده‌وروبه‌رى ئاواز پرژێن و شادى و سۆز و خه‌نده و ئارامييان ده‌به‌خشی، به‌ڵام به‌داخه‌وه ئێستا ده‌نگى ئه‌و هونه‌رمه‌ندانه له‌نێو كۆڕ و به‌زمى شادى و كۆبوونه‌وه‌ى ياران له‌نێو باخچه‌كانى ئه‌و شاره‌دا نابيسترێن، به‌ڵام بۆ هه‌ميشه ناو و نازناو و ده‌نگ و هونه‌ره‌كه‌يان له‌نێو دڵى دۆست و ياران و هه‌موواندا به‌زيندوێتى ماونه‌ته‌وه.
گرینگ نييه تا چه‌ند به‌رهه‌مى هونه‌ريت هه‌بێ، به‌ڵام ئه‌وه‌ى گرینگه به‌رهه‌مه‌كانت له‌نێو دڵ و ده‌روون و هه‌ستى بيسه‌ر و گوێگر و بينه‌ردا بۆ هه‌ميشه بوونيان هه‌بێـت و به‌زيندوویی بمێننه‌وه، له‌نێو هونه‌رمه‌ندانى موزيك و گۆرانيدا هه‌ندێك هونه‌رمه‌ندمان هه‌يه له ماوه‌ى ژيانى هونه‌ريدا به‌رهه‌مه‌كانيان كه‌م و پوخت و خاوه‌نى مۆركێكى ڕه‌سه‌نن و بۆ هه‌ميشه كاريگه‌ری و جێی خۆيان له‌نێو گه‌نجينه‌ى هونه‌رى موزيك و گۆرانى كورديدا بە به‌رزى هێشتۆته‌وه.
هونه‌رمه‌ندى كۆچكردوو محه‌مه‌د ئيبراهيم عه‌بدول له‌نێوه‌ندى هونه‌رى و ژيانى كۆمه‌ڵايه‌تى به (حه‌مه قوتوو) ناوبراوه و ده‌ناسرێت، ئه‌م هونه‌رمه‌نده زاده‌ى مه‌ڵبه‌ندێكه كه لێوانلێوه له ئه‌ده‌ب و ڕۆشنبيرى و هونه‌ر و به‌هره‌مه‌ند، له‌ژينگه جوان و پاك و بێگه‌رده‌كه‌ى (هه‌ڵه‌بجه) مه‌ڵبه‌ندى شاعيران و هونه‌رمه‌ندان به‌دنيا هات و گه‌شه‌ى كردووه.
هونه‌رمه‌ند محه‌مه‌د ئيبراهيم عه‌بدول له ساڵى (1939) له خانه‌واده‌يه‌كى ئايينى له گه‌ڕه‌كى جووله‌كانى شارى هه‌ڵه‌بجه له‌دايكبووه، تاقانه‌ى خانه‌واده و دوو خوشكى بووه به‌ناوه‌كانى (فاتيمه و ئايشێ)، باوكى هونه‌رمه‌ند ئيبراهيم عه‌بدول پياوێكى ئيماندار و له‌خواترس و نوورانى بووه به (ئيبراهيم حۆرى) ناسراوه، به‌داخه‌وه هونه‌رمه‌ند نه‌خراوه‌ته به‌رخوێندن، له كۆتایی ساڵانى ته‌مه‌نيدا هونه‌رمه‌ند خوێندنى قۆناغى نه‌هێشتنى نه‌خوێنده‌وارى ته‌واو كردووه توانيويه‌تى بنووسێت و بخوێنێته‌وه، به‌ڵام هه‌ر له‌ته‌مه‌نى منداڵييه‌وه هه‌ستى به‌به‌هره‌ى ده‌نگخۆشی كردووه، له‌نێو هاوڕێ و هاوه‌ڵه‌كانيدا له باخچه دڵگيره‌كانى شارى هه‌ڵه‌بجه وه‌ك (باخى مير و باخه بچكۆله و باخى گوڵان) گۆرانى گوتووه و به‌هره‌ى ده‌نگخۆشی گه‌شه‌ى كردووه تا هه‌واڵ گه‌يشتۆته‌وه باوكى و چه‌ندينجار باوكى لێى نيگه‌ران بووه و سه‌ركۆنه‌ى كردووه و پێى گوتووه ده‌ترسم ببيته چاوه‌ش، هه‌رچه‌نده ئه‌و وشه‌يه نيگه‌رانى ده‌كات و به‌ڵێن به‌خۆى ده‌دات كه به‌رده‌وام بێت له‌سه‌ر گۆرانی خوێندن و تا ببێت به گۆرانبێژ.
ته‌مه‌نى هه‌ڵده‌كشێ و عه‌شق و خولياى بۆ هونه‌رى گۆرانيگوتن زياتر په‌ره‌ده‌سێنێ و ده‌كه‌وێته ژێر كاريگه‌رى هه‌ردوو ده‌نگى به‌سۆزى هونه‌رمه‌ندان (سه‌يد عه‌لى ئه‌سغه‌رى كوردستانى و مه‌لا كه‌ريم) به لاساييكردنه‌وه‌ى گۆرانييه‌كانى ئه‌و دوو هونه‌رمه‌نده ده‌ست ده‌كات به گۆرانی خوێندن، هونه‌رمه‌ند كۆڵ نادات و به‌رده‌وام ده‌بێت له‌سه‌ر چرينى گۆرانى، به‌ڵام كاتێك ده‌زانێ كه هونه‌رمه‌ند (عومه‌ر ڕه‌زا 1942) ئاواز و هۆنراوه‌ى مامۆستا (ع،ع،شه‌ونم)ى بردووه له ڕاديۆ خوێندوويه‌تى و هه‌روه‌ها گوێبيستى ده‌نگى هونه‌رمه‌ندان (شه‌ماڵ سائيب 1931_ 8/11/1986) و (حه‌سه‌ن زيره‌ك 1921_26/6/1972) له ڕاديۆى كوردى به‌غدا ده‌بێت، هونه‌رمه‌ند محه‌مه‌د ئيبراهيم عه‌بدول هونه‌ره‌كه‌ى په‌لكێشى ده‌كات و به‌دزييه‌وه له ساڵى (1954) ڕوو ده‌كاته شارى به‌غدا و له ده‌رگاى ڕاديۆى كوردى به‌غدا ده‌دات، به‌پێى ئه‌و هه‌ڵسه‌نگاندن و تاقيكردنه‌وه‌ى ده‌نگه خۆشه‌كان لهلايهن ليژنه‌ى هه‌ڵسه‌نگاندنى ڕاديۆوه، ئاشكرايه كه ده‌نگى خۆشی هونه‌رمه‌ند محه‌مه‌د ئيبراهيم عه‌بدول سه‌رساميان ده‌كات و به‌خۆشحاڵييه‌وه وه‌رده‌گيرێت، له‌و ساڵه‌دا هونه‌رمه‌ند شەش گۆرانى له‌گه‌ڵ تيپى مۆسيقاى ڕاديۆى كوردى به‌غدا تۆمار ده‌كات به ناوه‌كانى (گوڵاڵه سووره، مه‌گرى مه‌گرى، باران بارانه، خانم خانم، له كۆڵانى ته‌نگ و هه‌ى به‌لار و به‌لار)، وێڕاى به‌رزنرخاندن و ده‌ستخۆشی بۆ ئه‌و گرووپه مۆسيقيیه‌ى ڕاديۆى كوردى به‌غدا كه هه‌موويان عه‌ره‌ب بوون، هونه‌رمه‌ندانى كورد به‌و په‌ڕى لێهاتوویی و توانا و ئه‌دا و گه‌رووى كوردانه‌يان، موزيكژه‌نه عه‌ره‌به‌كانيان دواى ده‌نگ و ئاوازه كوردييه ڕه‌سه‌نه‌كان خستووه، دواى ئه‌وه چه‌ندين جارى تر چۆته ڕاديۆى كوردى بۆ مه‌به‌ستى تۆماركردنى به‌رهه‌مه‌كانى و له نزيكه‌وه ئاشنايه‌تى له‌گه‌ڵ هونه‌رمه‌ندانى ئه‌و كاتى ڕاديۆى كوردى به‌غدا هونه‌رمه‌ندان (عه‌لى مه‌ردان، محه‌مه‌د عارف جزيرى، حه‌سه‌ن جزيرى، عيسى به‌روارى و ...تاد ) په‌يدا ده‌كات.
سه‌باره‌ت به گۆرانى (له‌كۆڵانى ته‌نگ) هونه‌رمه‌ند له ساڵى (1954) له ڕاديۆى كوردى به‌غدا خوێندوويه‌تى، دواتريش له‌ساڵى (1978 بۆ 1979) له‌گه‌ڵ تيپى مۆسيقاى ميلـلى زانكۆى سلێمانى به سه‌رپه‌رشتى هونه‌رمه‌ند و مامۆستا ئه‌نوه‌ر قه‌ره‌داخى به‌ده‌نگ و ڕه‌نگ بۆ ته‌له‌فزيۆن تۆمارى كردووه، سه‌باره‌ت به تێكست و ئاوازى ئه‌و گۆرانييه ده‌ڵێن فۆلكلۆره، به‌ڵام شاعير و نووسه‌ر و ئاوازدانه‌ر مامۆستا (ع،ع، شه‌ونم 1925_ 10/10/2020) مێژووى ئه‌و گۆرانيه‌مان بۆ ڕوون ده‌كاته‌وه و پێمان ده‌ڵێت:
ئه‌م گۆرانييه مێژووه‌كه‌ى ده‌گه‌ڕێته‌وه بۆ ساڵى 1932 (ئه‌حمه‌د موختار جاف 1896_6/2/1935) شاييه‌كى كرد بۆ (ئه‌فراسيا و غاندى) كوڕى، شایی (خه‌ته‌نه‌سووران) ناردى به‌دواى (ئه‌حمه‌د نازدارى) له‌بياره‌وه بانگى كردوو هێنايان بۆ هه‌ڵه‌بجه، ئه‌م ئه‌حمه‌دى نازداریيه زۆر ده‌نگى خۆشبوو ئه‌و گۆرانييه ئه‌و دايناوه) (*2).
بۆ زانيارى زێده‌تر هونه‌رمه‌ند و پێشمه‌رگه (حه‌مه جه‌زا 8/11/1949_1/10/2010) گۆرانى له كۆڵانى ته‌نگه‌به‌ر له‌گه‌ڵ تيپى هونه‌رى هه‌ولێر له ساڵى 1978 بۆ ته‌له‌فزيۆن تۆماركردووه له ئاماده‌كردنى هه‌ردوو هونه‌رمه‌ند وريا ئه‌حمه‌د و ڕزگار خۆشناو بووه.(*3)
بۆ درێژه‌دان و به‌رده‌وامبوون به‌كارى هونه‌ری، هونه‌رمه‌ند له ساڵى (1974) يه‌كه‌مين گۆرانى بۆ ته‌له‌فزيۆنى كه‌ركووك تۆمار ده‌كات به‌ناوى (هه‌ى داده هه‌يڕۆ).
هونه‌رمه‌ند محه‌مه‌د ئيبراهيم عه‌بدول هونه‌رمه‌ندێك بووه له‌پێناو هونه‌ره‌كه‌يدا ژياوه، نه‌ك هونه‌ره‌كه‌ى بيژێنێت، هونه‌رمه‌ندێكى خۆڕسك و دڵ و داوێن پاك و نه‌فس به‌رز و عاشقى هونه‌ر و موزيكى نه‌ته‌وه‌كه‌ى بووه.
سه‌باره‌ت به تێكست و ميلۆدى گۆرانييه‌كانى له‌ڕێی به‌رنامه‌ى ڕاديۆیی (ئێوه و ئه‌م هونه‌رمه‌نده)دا ده‌ڵێت: زۆربه‌ى گۆرانييه‌كانم له هۆنراوه و ئاوازى خۆمن و تێكه‌ڵ به‌فۆلكلۆرم كردوون، ته‌نانه‌ت كاتێ گۆرانى يه‌كێكى تريشم گوتبێته‌وه، ده‌ستكاريم كردووه و دامڕشتۆته‌وه، ده‌نگى هه‌ريه‌ك له‌م هونه‌رمه‌ندانه (سه‌يد محه‌مه‌دى سه‌فایی، ئيبراهيمى قادرى، حه‌سه‌ن گه‌رميانى، به‌رهه‌م حه‌سه‌ن، عاره‌ب عوسمان و جه‌لال سه‌عيد) كاريگه‌ریی هونه‌رييان له‌سه‌رم هه‌بووه) ( *4).
په‌يوه‌ست به‌يادكردنه‌وه له هونه‌رمه‌ندى ده‌نگخۆشی شاره‌كه‌ى هه‌ڵه‌بجه به‌تايبه‌تى و كوردستان به‌گشتى (محه‌مه‌د ئيبراهيم عه‌بدول) هه‌رچه‌نده له بنه‌ڕه‌تدا زاده‌ى ناوچه شيرين و دڵڕفێنه‌كه‌ى هه‌ورامان نييه، به‌ڵام كاريگه‌رى فه‌رهه‌نگ و كه‌لتوور و هونه‌رى هه‌ورامانى له‌سه‌ر بووه له گۆرانى خوێندندا، هه‌روه‌ها پێويسته ئه‌رك و ماندووبوونى مامۆستا و هونه‌رمه‌ندان ئه‌نوه‌ر قه‌ره‌داخى و ئازاد ساڵح سه‌رۆكى تيپى مۆسيقاى شنرۆێ له ئاماده‌كردن و دابه‌شكردنى گۆرانييه‌كانى هونه‌رمه‌ند، هه‌روه‌ها هه‌موو ئه‌و هونه‌رمه‌نده ژه‌نياره به‌ڕێزانه له‌ياد نه‌كه‌ين و ده‌ستخۆشييان لێ بكه‌ين، كه پاڵيشت و هاوكارێكى باشى هونه‌رمه‌ند بوون له تۆماركردنى ئه‌و كۆمه‌ڵه به‌رهه‌مه جوان و ناوازانه.
هونه‌رمه‌ند له‌ماوه‌ى ژيانى كۆمه‌ڵايه‌تيدا گه‌لێك كار و پيشه‌ى كردووه وەك شۆفێرى، چايخانه و كارى ئووتنچێتى)، له ساڵى 1968 به‌هۆى ئه‌وه‌ى كارى شۆفێرى كردووه له‌نێوان سلێمانى و به‌غدا، ماڵ و شوێنى نيشته‌جێبوونى ده‌گوازێته‌وه بۆ شارى به‌غدا و تا ساڵى 1980 به ماڵه‌وه ده‌گه‌ڕێته‌وه شارى هه‌ڵه‌بجه و كارى چايچێتى ده‌كات و چايخانه‌ى (شنروێ) ده‌بێته پێگه‌ى كه‌سايه‌تى و هونه‌ردۆستان و ئه‌ديبان و شاعيرانى شارى هه‌ڵه‌بجه.
له ساڵى 1982 به‌شى ڕۆشنبيرى و جه‌ماوه‌ر له هه‌ڵه‌بجه ده‌كرێته‌وه و وه‌ك (هونه‌رمه‌ند) داده‌مه‌زرێت و درێژه به كاره هونه‌رييه‌كانى ده‌دات و ڕۆڵێكى گرینگ و به‌رچاوى هه‌بووه.
بۆ به حه‌مه قوتوو ناسراوه؟؟
جوانى باڵا و شيكپۆشی جلوبه‌رگ يه‌كێكه له خه‌سڵه‌ته جوانه‌كانى مرۆڤ و هه‌موو كات سه‌رنجى ده‌وروبه‌ر به‌لاى خۆيدا ڕاده‌كێشێ، سه‌باره‌ت به‌و نازناوه، هونه‌رمه‌ندى ده‌نگبێژ و سروودبێژ نه‌جم محه‌مه‌د نوسيويه‌تى:
خۆی وایگێڕاوه‌ته‌وه (مناڵبووم گۆرانیم ده‌گوت پاك و خاوێن و جلی جوانم له‌به‌ر ده‌كرد و كڵاوم له‌سه‌ر ده‌نا و له‌ناو باخی میر و باخه‌بچكۆلدا و به كۆڵانه‌كاندا گۆرانیمان ده‌گوت، جا ئه‌وه‌نده بچكۆله و پاك و خاوێن بووم خه‌ڵكی ئه‌یانوت پێم قوتیله، قوتیله بوو به‌قووتوو).(*5)
هه‌روه‌ها مامۆستا و هونه‌رمه‌ند ئازاد ساڵح سه‌رۆكى تيپى مۆسيقاى شنروێ ده‌ڵێت:
لێم پرسی ئه‌م قووتووه له كوێوه هاتووه؟ واى بۆ باس كردم و گوتى: دوكانى ئوتووم هه‌بوو زۆر شيكپۆش و جوانپۆش بووم، هه‌موو كاتێك وايان ده‌زانى له قوتوو هاتوومه‌ته ده‌ره‌وه)(*6).
هونه‌رمه‌ند به‌هاوكارى تيپه مۆسيقييه‌كانى وه‌ك ( تيپى مۆسيقاى ميلـلى زانكۆى سلێمانى و تيپى مۆسيقاى مه‌وله‌وى و تيپى مۆسيقاى شنروێ) ژماره‌يه‌ك گۆرانى بۆ ته‌له‌فزيۆنى كه‌ركووك تۆمار كردووه و بڵاو بۆته‌وه كه توانيويه‌تى خزمه‌تێكى گه‌وره به هونه‌رى گۆرانى ديالێكتى هه‌ورامى و سۆرانى بكات و چه‌ندين ئاوازى كۆنى هه‌ڵه‌بجه و شاره‌زوور له فه‌وتان ڕزگار بكات و به ده‌نگه خۆشه‌كه‌ى سه‌رله‌نوێ بيانچڕێ و زيندوويان بكاته‌وه.
ڕۆژنامه‌نووس و هونه‌ردۆست تاهير كرمانج له‌باره‌ى به‌رهه‌مه‌كانى هونه‌رمه‌نده‌وه نووسيويه‌تى: سه‌رجه‌مى به‌رهه‌مه‌كانى هونه‌رمه‌ند زياتر له 26 گۆرانى له ڕاديۆى كوردى به‌غدا هه‌يه، هه‌روه‌ها 16 گۆرانى له‌ته‌له‌فزيۆنى كه‌ركووك و به‌غدا هه‌يه، هه‌رچه‌نده هونه‌رمه‌ندى خوالێخۆشبوو زۆر ده‌ستكورت و نه‌دار بوو هه‌موو جار ده‌يگوت من له‌خزمه‌تى هونه‌ردا ماندوو نابم، ئاماده‌م سێ شه‌و و ڕۆژ نان و ئاو نه‌خۆم له نۆره‌دا بم تا به‌رهه‌مه‌كه‌م تۆمار بكه‌م، گه‌ر له ژيانم هيچم بۆ هونه‌رى كوردى نه‌كردبێـت خۆ توانيومه زياتر له 50 گۆرانى فۆلكلۆرى له فه‌وتان و نه‌مان ڕزگار بكه‌م، خوداى گه‌وره منى دروستكردووه بۆ ئه‌وه‌ى خزمه‌تى هونه‌رى ميلـله‌ته‌كه‌م بكه‌م) (*7).
هونه‌رمه‌ند ساڵى 1959 ژيانى هاوسه‌رى پێكهێناوه له‌گه‌ڵ خاتوو
مه‌ليحه ساڵح يوونس، به‌رهه‌مى ئه‌و هاوسه‌رگيرييه‌ى هونه‌رمه‌ند و خاتوو مه‌ليحه 4 كچ و 2 كوڕ بووه، به‌داخه‌وه شوانه‌ى كوڕى پێشمه‌رگه‌ى حيزبى شيووعى بووه و له هه‌ڵمه‌ته‌كانى ئه‌نفالى قه‌ره‌داخدا له ساڵى 1988 له گوندى ميرياسى شه‌هيد ده‌كرێت، ئه‌م كاره‌ساته ناخ هه‌ژێن و جه‌رگبڕه تا دواساته‌كانى ژيانى هونه‌رمه‌ند كاريگه‌رى زۆرى له‌سه‌ر ده‌بێت و له دنيا جوانه‌كه‌ى هونه‌ر دوور ده‌كه‌وێته‌وه و به‌و ئازاره‌وه ده‌تلێته‌وه.
گۆرانييه‌كانى هونه‌رمه‌ند محه‌مه‌د ئيبراهيم عه‌بدول كه تا ئێستا له‌گوێی هه‌واداران و گوێگرانى هونه‌رى ڕه‌سه‌ندا ده‌زرينگێته‌وه و بۆن به‌رامه و مۆركى هه‌ورامان و هه‌ڵه‌بجه‌و شاره‌زوورن، بريتين له (له كۆڵانى ته‌نگ، هه‌ى سه‌وزه سه‌وزه، ئه‌م ئێواره‌يه، نايه ده‌نگى لايه‌كه‌ت، سه‌وزه كاڵه‌به‌ى، كه‌نيله، هه‌ريه‌سه، له‌نجه گيان به‌له‌نجه، بيمارم، مه‌گرى مه‌گرى، بچمه قاسم خان، ئه‌ى ياران ياران، ئه‌ى داده ڕۆ ڕۆ، كۆڵان به‌كۆڵان، شيرين دامه‌چۆ، ڕێحان، ئاى له خاڵانى، به‌ر قه‌ڵا مه‌ڕۆ، ئامين و ئامين، قه‌ڵاى سينگ بارانى خه‌م،خڕبينايی ديده‌م.....تاد).
له نێوان ساڵانى 1979 تا 1986 جوانترين و پڕ به‌رهه‌مترين سه‌رده‌مى به‌خشينى هونه‌رى ده‌نگه خۆشه‌كه‌ى هونه‌رمه‌ند بووه كه به هاوكارى تيپى ميلـلى زانكۆى سلێمانى و تيپى مۆسيقاى مه‌وله‌وى و تيپى مۆسيقاى شنرۆێ ئه‌و به‌رهه‌مانه‌ى له ته‌له‌فزيۆن تۆمار كردووه، له ساڵى 1982 هونه‌رمه‌ند ئازاد ساڵح له‌گه‌ڵ هاوكاره ژه‌نياره‌كانیی تيپى مۆسيقاى شنرۆێ گۆرانى (ئاى له خاڵانى) له باخه‌كانى باوه كۆچك خودى هونه‌رمه‌ند ئازاد ساڵح به كامێراى سينه‌مایی به‌ده‌نگ و ڕه‌نگ بۆى تۆمار ده‌كات، هه‌روه‌ها هونه‌رمه‌ند له ساڵى 1991 سه‌ردانى شارى مه‌ريوان ده‌كات و له‌و گه‌شته‌دا شه‌وێك له‌گه‌ڵ هونه‌رمه‌ند عه‌ينه‌دين ميوانى ماڵێك ده‌بن و هه‌ردوو هونه‌رمه‌ند به‌ده‌نگه خۆشه‌كه‌يان شه‌وێكى لێوڕيژ له ئاوازى گه‌ڕيان و ميلۆدييه خۆشه‌كانى هه‌ورامان و هه‌ڵه‌بجه و شاره‌زوور تۆمار ده‌كه‌ن و شادى و خه‌نده به‌ئاماده‌بووان ده‌به‌خشن.
هونه‌رمه‌ند محه‌مه‌د ئيبراهيم عه‌بدول سێ جار چۆته وڵاتى سعوديه‌وه و سه‌ردانى ماڵى خوداى كردووه، واته سێ حه‌جى كردووه (*8).
ئه‌م هونه‌رمه‌نده قسه‌خۆش و خۆش مه‌شره‌ب و شادى به‌خشه به ده‌وروبه‌ر و هاوڕێيان و خانه‌واده و جگه‌رگۆشه‌كانى، هه‌روه‌ها باوكێكى ميهره‌بان و زمان شيرين و ڕه‌فتار نه‌رمونيان بووه له‌گه‌ڵ منداڵه‌كانى و زۆرجار له ماڵه‌وه كه حه‌زى كردووه گۆرانى بخوێنێ، منداڵه‌كانى له ده‌ورى خۆى كۆكردۆته‌وه و پێى گوتوون من گۆرانى ده‌ڵێم بۆتان و ئێوه‌ش ببنه كۆرس و سه‌ربه‌ندى گۆرانييه‌كه‌م بۆ بڵێنه‌وه.
به‌داخه‌وه ئه‌م هونه‌رمه‌نده مه‌زنه، ئه‌و ده‌نگه گه‌شاوه و ڕه‌سه‌ن و زيندووكه‌ره‌وه‌ى فۆلكلۆره له وه‌رزى زستانى ساڵى 1992 ئه‌و ساڵه زستانیی شارى سلێمانى، زستانێكى سه‌خت و سارد و ڕه‌هێڵه و باو زريان بوو، له شه‌وى 10 له‌سه‌ر 11/2/1992 له ميواندارى له لاى هاوڕێيه‌كى هه‌ڵه‌بجه‌یی ده‌بێت و به‌نيازى گه‌ڕانه‌وه بۆ ماڵ، له‌نزيك ميوانخانه‌ى (ئه‌بوو سه‌نا) دووچارى جه‌ڵته‌ى ده‌ماغ ده‌بێت، به‌داخه‌وه له‌به‌رئه‌وه‌ى به‌ته‌نها بووه، له‌ناو ئۆتۆمبێله‌كه‌يدا به ئازاره‌وه ده‌مێنێته‌وه تا گيانى ده‌سپێرێت و كۆچى دوایی ده‌كات و كه‌س هه‌واڵى نازانێت، تا به‌يانى له‌ناو ئۆتۆمبێله‌كه‌يدا به‌ته‌نيا ده‌مێنێته‌وه، دواى گه‌ڕانێكى زۆر لهلايهن خانه‌واده و كه‌سوكارييه‌وه له‌و شوێنه‌دا ده‌يدۆزنه‌وه.
ڕۆحى شاد و ياد و ياده‌وه‌رييه‌كانى هه‌موو كات به‌رز و به‌ڕێز و سڵاو له مێژووى به‌رزى هونه‌رى هونه‌رمه‌ند حه‌مه قوتوو، هه‌رچه‌نده به‌جه‌سته لێمان دووره، به‌ڵام ده‌نگ و هونه‌ركه‌ى هه‌ميشه زيندووه و وه‌ك ميراتگرى ده‌نگه به‌سۆزه‌كه‌ى هونه‌رمه‌ند محه‌مه‌د ئيبراهيم عه‌بدول بتوانێت به باشترين شێوه و شێوازى ده‌نگى گۆرانييه‌كانى هونه‌رمه‌ند بڵيته‌وه ئه‌ويش هونه‌رمه‌ندى ئازيز (ئازاده ڕه‌ش)ـه، به‌هيواى سه‌ركه‌وتن و به‌رده‌وامى له هونه‌ردا بۆ كاك ئازاده ڕه‌ش ده‌خوازم.
جه‌مالى ده‌لاك 27/3/2021 هه‌ولێر.
سه‌رچاوه: ( *1) هۆنراوه‌ى (برينێكى به‌ئازار) (ديار هه‌ڵه‌بجه‌یی) ماڵپه‌ڕى (ئه‌نفالستان) 15/3/2020.
(*2) يادێك له هونه‌رمه‌ند (حه‌مه قوتوو) كه‌ناڵى ئاسمانى (NRT) ساڵى 2014.
(*3) چريكه و سۆزى،، حه‌مه جه‌زا،، كۆكردنه‌وه و ئاماده‌كردنى (عه‌بدولواحيد ئيدريس شه‌ريف) 2011، لاپه‌ڕه (163).
(*4) به‌رنامه‌ى (ئێوه و ئه‌و هونه‌رمه‌نده) له ڕاديۆى كوردى به‌غدا په‌خش كراوه، له ساڵى 1986 له ئاماده‌كردنى جاسم وه‌ندى و پێشكه‌شكردنى نيشتمان عومه‌ر، ئه‌و ديداره له ساڵى 1986 له شارى سلێمانى هونه‌رمه‌ند جاسم وه‌ندى له‌گه‌ڵ هونه‌رمه‌ند محه‌مه‌د ئيبراهيم عه‌بدول، سازي كردووه.
(*5) هونه‌رمه‌ندێ له له‌نجه‌ى گۆرانى،، هه‌ناسه يادێك له هونه‌رمه‌ندى نه‌مر محه‌مه‌د ئيبراهيم عه‌بدول، له ئه‌كاونتى خۆى له تۆڕى كۆمه‌ڵايه‌تى فه‌يسبووك له ڕيكه‌وتى (13/2/2019) بڵاوي كردۆته‌وه.
(*6) به‌سوپاسێكى زۆره‌وه بۆ مامۆستا و هونه‌رمه‌ند ئازاد ساڵح سه‌رۆكى تيپى مۆسيقاى شنروێ و هه‌روه‌ها هونه‌رمه‌ند عه‌زيز حه‌مه كه‌ريم ناسراو به (مامه عه‌زه) له ڕێی ماسنجه‌ره‌وه زانيارييان له‌سه‌ر هونه‌رمه‌ند محه‌مه‌د ئيبراهيم عه‌بدول پێبه‌خشيوم.
کۆمێنت (0)
تا ئێستا هیچ کۆمێنتێک نەکراوە.