لە كاتی پێوەدانی دووپشك چی بكرێت باشە؟

ئێستا كە لە دەستپێكی وەرزی گەرما نزیك دەبینەوە، حاڵەتی روودانی پێوەدانی دووپشك بەتایبەت لە گوند و ناوچە چۆلەوانییەكان زیاد دەبن، بۆیە لە كاتی پێوەدانی دووپشك پێویستە چەند هەنگاوێك ئەنجام بدەیت.

ئەگەر دووپشك پێی وەدای پێویستە بە خێرایی ئەم كارانە بكەیت:-

1-  پێش هەموو شتێک ئەبێ هەراسان و مشەوەش نەبین و بە لەسەرخۆیی و دڵدانەوەی کەسە تووشبووەکە دەست پێ بکەین.

2-  شۆردنی شوێنەکە بە ئاوی سارد و سابوون بۆ پاک بوونەوە و رێگری لە هەوکردن.

3-  خستنی پاڵەپەستۆێ سارد لە شوێنەکە بۆ ماوەی چەند خولەکێک.

4-  دەرکردنی دەزیلەی ژەهر ئەگەر هەبێت.

5-  ئەگەر شوێنی پێوەدانەکە لە دەست یان قاچ بێت، بەرزکردنەوەی بە ئاراستەی بەرزی دڵ، ئەمەیان ڕێگری لە ئاوسان دەکات.

6-  لە هەندێک سەرچاوە ئاماژە بەوە کراوە دەکرێت لۆکە یان کلینکسێک بە فاس (شلەی سپیکەرەوەی جلوبەرگ ) بکەین و شوێنەکەی پێ چەور بکەین بۆ ماوەی پێنج خولەک، ئەمەیان یارمەتیدەرە بۆ کەمکردنەوەی ژەهراویبوون بە کارلێکی کیمییاوی لەگەل ژەهرەکە.

7- دەرهێنانی خێرای ئەلقە و گوستیلە و بازنە.

8- گەیاندنی تووشبوو بۆ نەخۆشخانەی فریاکەوتن بۆ چارەسەری کۆتایی و پێدانی دژە ژەهر ئەگەر پێویستی کرد بە پێی ڕێنمایی پزیشک.

لە كاتی پێوەدانی دووپشك دەبێت ئەم كارانەی سەرەوە بكەین، ئەی دەبێت چ نەكەین؟

1- نابێ ڕەفتاری ئەوها بکەین کەسی تووشبوو تووشی دڵەڕاوکێ و ترس بکات وەکو قیژاندن و هەراسان بوون.

2- لە ئەگەری بوونی دەزیلەی پێوەدان نابێ پێش شۆردن و ساردکردنەوەی شوێنەکە دەزیلەکە دەربکرێت.

3- نابێ شوێنەکە بریندار بکرێت یان کەسێک هەولی مژینی شوێنی پێوەدان بدات بە بەهانەی دەرکردنی ژەهر.

4- نابێ هەوڵبدرێت بە بەستنەوەی دەست یان قاچ بە هیچ جۆرێک و لە هیچ سەرچاوەیەک ڕێگای پێ نەدراوە.

5- لە کاتی گەیاندنی نەخۆش بۆ فریاکەوتن ئاگاداری لێخوڕینی ئۆتۆمبێل بین تا تووشی رووداوی نەخوازراو نەبین.