وەزیری دەرەوەی بەلجیکا ھاژا لاھبیب ڕایگەیاند کە لەئێستادا، مەترسی تەشەنەسەندنی ململانێیەکان لە ڕۆژھەڵاتی ناوەڕاست لە ھەر کاتێکی دیکە زیاترە.
ھاژا لاھبیب بەر لە بەشداریکردنی لە کۆبوونەوەی وەزیرانی دەرەوەی وڵاتانی ئەندام لە ناتۆ لە بڕۆکسل لە لێدوانێکی ڕۆژنامەوانیدا، ئاماژەی بەوەداوە کە بەشداربووانی کۆبوونەوەکە، دۆخی ناوچەی ڕۆژھەڵاتی ناوەڕاست تاوتوێ دەکەن.
گوتیشی: لەئێستادا، مەترسی تەشەنەسەندنی ململانێیەکان لە ڕۆژھەڵاتی ناوەڕاست لە ھەر کاتێکی دیکە زیاترە، ھەروەھا زۆربەی ھاوپەیمانەکانمان ھەست بە نیگەرانییەکان لەبارەی خراپی دۆخی مرۆیی لە ناوچەکە دەکەن.
باسی لەوەش کرد: ھەفتەی ڕابردوو سەردانی ناوچەکەم کرد و لە میانیدا داوامان کرد کە شەڕ لە ناوچەکە بوەستیندرێت، بەڵام بەداخەوە تا ئێستا ھیچ ئەنجامێک لەوبارەیەوە بەدی نەھاتووە.
ڕاشیگەیاند: ئەم دۆخە، گومان لە توانا ڕاستەقینەکانمان دروست دەکات بۆ وەستاندنی توندوتیژی لە ناوچەکە، ھەروەھا پرسیارێک دەوروژێنێت کە بۆچی تۆمەتبار دەکرین بە جێبەجێکردنی پێوەری دوو ڕوویی.
کۆمێنت (0)
تا ئێستا هیچ کۆمێنتێک نەکراوە.