Erbil 15°C شەممە 13 نیسان 02:35

وەزیری پەروەردە سەرەخۆشی لە خانەوادەی قوربانییانی كارەساتەكەی بەسڕە دەكات

کوردستان TV
100%

وەزیری پەروەردەی حكوومەتی هەرێمی كوردستان سەرەخۆشی لە خانەوادەی قوربانییانی كارەساتەكەی ئێوارەی ئەمڕۆی پارێزگای بەسڕە كرد كە بەهۆیەوە ژمارەیەك قوتابی لە رووداوێكی هاتوچۆدا بوونە قوربانی.

ئالان حەمە سەعید وەزیری پەروەردە رایگەیاند: بە داخ و پەژارەیەکی زۆرەوە، هەواڵی گیانسپاردن و برینداربوونی ژمارەیەک قوتابی خۆشەویستی پارێزگای بەسڕەمان پێگەیشت لە ڕووداوێکی هاتووچۆدا.

راشیگەیاند: ئێمە لە وەزارەتی پەروەردەی حکوومەتی هەرێمی کوردستان، پرسە و سەرەخۆشی لە خانەوادەی قوربانییەکان و مامۆستا و هاوڕێیانیان دەکەین بۆ ئەو کارەساتە بە ئازارە.

ئالان حەمە سەعید ئاماژەی بەوەش دا: داوا لە خوای گەورە دەکەین قوربانییەکان بخاتە بەر بەزەیی خۆی و شیفای خێرای بریندارەکانیش بدات و سەبر و ئارامیش بە هەمووان ببەخشێت.

ئێوارەی ئەمڕۆ سێشەم لە پارێزگەی بەسڕە رووداوێكی سەختی هاتوچۆ كەوتەوە كە تێیدا بارهەڵگرێك كۆنتڕۆلی لەدەست دا و بەهۆیەوە كۆمەڵێك قوتابی شێلا كە لەسەر شەقامی بەردەم قوتابخانەكەیان بوون.

لە ئەنجامی رووداوەكە 6 قوتابی گیانیان لەدەست دا و 8ی دیكەش بریندار بوون.

عەباس تەمیمی بەڕێوەبەری تەندروستی بەسڕە لەبارەی رووداوەكە رایگەیاند: رووداوەكە لەبەردەم قوتابخانەیەكی بنەڕەتی روویداوە، لەبەر ئەوە سەرجەم قوربانییەكان تەمەنیان لەنێوان 6 بۆ 12 ساڵاندایە.

هەر بەهۆی كارەساتەكە، ئەسعەد عیدانی پارێزگاری بەسڕە بڕیاری دا سێ رۆژ ماتەمینی گشتی لە پارێزگاكەیان بەڕێوەبچێت.

بەگوێرەی دانپێدانانی سەرەتایی شوفێرەكە بارهەڵگرەكەی ئیستۆپی نەماوە و كۆنتڕۆلی لەدەستداوە و لە ئەنجامیشدا ئەم كارەساتەی ناوەتەوە.

کوردستان

کۆمێنت (0)

تا ئێستا هیچ کۆمێنتێک نەکراوە.

وەڵام بدەوە وەک میوان

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.