قوباد تاڵه‌بانی سه‌ره‌خۆشی له‌ سه‌رۆك بارزانی دەکات

به‌هۆی كۆچی دوایی زەکیا مستەفا بارزانی،  قوباد جه‌لال تاڵه‌بانی، جێگری سه‌رۆكی حكومه‌تی هه‌رێمی كوردستان  پرسه‌نامه‌یه‌ك ئاراسته‌ی سه‌رۆك مه‌سعود بارزانی ده‌كات.

له‌ پرسه‌نامه‌كه‌ی قوباد تاڵه‌بانییدا هاتووه‌،  بەبیستنی هەواڵى کۆچی دوایی خاتوو (زەکیا مەلا مستەفا)ی خوشکی بەڕێزتان، نیگەران و دڵگران بووم. بەم بۆنەیەوە پرسە و سەرەخۆشی ئاراستەی بەڕێزتان و خانەوادە و هەموو ئازیزانی خاتوو زەکیا دەکەم و خۆم بە هاوبەشی خەمتان دەزانم.

ده‌شڵێت، خوای گەورە لە کۆچکردوو خۆش بێت و سەبوری و دڵنەواییش بە جەنابتان و بە هەموو لایەک ببەخشێت.

سه‌ر له‌ به‌یانی رۆژی هه‌ینی 23ـی 2ی 2024، زەکیا مستەفا بارزانی، خوشكی  سه‌رۆك بارزانی به‌ نه‌خۆشی كۆچی دوایی كرد.

یەکەم رۆژی پرسەی خوالێخۆشبوو زەکیا مستەفا بارزانی ئه‌مڕۆ شەممە 24ی 2ی 2024، لە هۆڵی تەشریفاتی بارەگای بارزانی لە شارۆچكەی سەڵاحەددین بەڕێوەچوو .

بارەگای بارزانی لە راگەیەندراوێکدا دوێنێ هه‌ینی رایگه‌یاند، پرسەی خوشکی جەنابی سەرۆک بارزانی خوالێخۆشبوو زەکیا مستەفا بارزانی، لە رۆژی شەممە 24ی 2ی 2024 بۆ ماوەی سێ ڕۆژ لە هۆڵی تەشریفاتی بارەگای بارزانی لە شارۆچكەی سەڵاحەددین بەڕێوەدەچێت.

لەبارەی کاتی پرسه‌وه‌، بارەگای بارزانی رايگه‌یاندووه‌، بەیانیان، كاتژمێر 10هەتا 12ی پێشنیوەڕۆ و ئێواران، كاتژمێر 2 هەتا5ـی ئێوارە، پرسە لە هۆڵی تەشریفاتی بارەگای بارزانی بەڕێوەدەچێت.