شاره‌زایه‌كی كه‌شناسی ره‌وشی كه‌شوهه‌وای سبه‌ی شه‌ممه و رۆژانی داهاتووی ناوچه‌كانی هه‌رێمی كوردستانی خسته‌ڕوو و تێیدا ئاماژه‌ی به‌وه دا كه بارانبارین به‌رده‌وام ده‌بێت و له ناوچه شاخاوییه‌كانیش به‌فرێكی زۆر ده‌بارێت.
ئاراس جه‌بار شاره‌زای كه‌شناسی رایگه‌یاند: بۆ سبەی شەممە بارانی پچڕپچر بە ڕێژەی مامناوەند و ھەورەبروسکە بەردەوامی دەبێت.
ڕاشیگه‌یاند: لە ئەنجامی ھاتنی ھەوایەکی سارد لە دەریای ناوەراستەوە، پلەکانی گەرما بە راورد بە ئەمڕۆ هه‌ینی 4 تا 5 پلە نزمبوونەوە بەخۆیەوە دەبینێت.
هه‌روه‌ها ڕایگه‌یاند: ئەگەری بارینی بەفریش لە ناوچە شاخاوییە بەرزەکان لە بەرزی 1700 مەتر لە ئاستی ڕووی دەریاوە دەبێت، خێرای باش لەسەرخۆ و ھەندێک کات مامناوەند دەبێت لە ئاراستەی باشوور و باشووری رۆژئاواوە.
شاره‌زاكه‌ی كه‌شناسی ئاماژه‌ی به‌وه‌ش دا كه کاریگەری ئەم قۆناغەی بارانبارین، سبەی شەو کۆتایی پێ دێت .
ئاراس جه‌بار گوتیشی: بۆ رۆژانی داھاتوو لە یەکشەممەوە 18ی مانگ تا 22 مانگ لە ئەنجامی بەردەوامی کاریگەری لاوازی نزمەپاڵەپەستۆکەی دەریای ناوەراست و هه‌روه‌ها ئەو بارانە زۆرەی لە ناوچەکاندا باریوە، شێی پێویست دەبێت بۆ چربوونەوەی ھەور و رۆژانە لە کاتەکانی نێوان نیوەرۆ بۆ ئێوارە ئەگەری دروستبوون و گەشەکردنی کەڵەکەھەوری جێگیر و تاوەباران و بروسکە لەسەر ناوچەی جیاجیا دەبێت.
کۆمێنت (0)
تا ئێستا هیچ کۆمێنتێک نەکراوە.