ئه‌مڕۆ له‌ هه‌ولێر به‌هۆی زۆری به‌فربارینه‌وه‌ چه‌ند رێگه‌یه‌ك داخران

سه‌رله‌به‌یانی ئه‌مڕۆ یه‌كشه‌م به‌هۆی بارینی رێژه‌یه‌كی زۆری به‌فره‌وه‌، چه‌ند رێگه‌یه‌كی سه‌ره‌كی له‌ سنووری پارێزگه‌ی هه‌ولێر داخران.

پارێزگه‌ی هه‌ولێر بڵاوی كرده‌وه‌: ئەم شەپۆلە بەفرەی سنووری پارێزگای هەولێری گرتەوە، لە هەندێک شوێن بووە هۆی داخستنی رێگه‌ی سەرەکی وه‌ك شێخ مەموودیان، زینەتیر، بالیسان.

ئاماژه‌ی به‌وه‌ش دا كه‌ دواتر لەلایەن تیمەکانی چاککردنەوە و پاراستنی رێگاوبانی ھەولێره‌وه‌ دەست کرا بە خاوێنکردنەوەی به‌فره‌كان.

پارێزگه‌ی هه‌ولێر جه‌ختیشی كرده‌وه‌ كه‌ ئێستا سه‌رجه‌م رێگاکان بە ڕووی شوفێران و هاووڵاتییان كراوه‌ن و كێشه‌یان نه‌ماوه‌.