وه‌زاره‌تی گه‌نجینه‌ی ئه‌مه‌ریكا ئه‌مڕۆ دووشه‌م سه‌پاندنی سزای به‌سه‌ر بانكێكی عێراقی و خاوه‌نه‌كه‌ی راگه‌یاند به‌هۆی ئه‌نجامدانی ساخته‌كاری و سپیكردنه‌وه‌ی پاره بۆ ئێران و به‌كارهێنانیان بۆ تیرۆر.
وه‌زاره‌تی گه‌نجینه‌ی ئه‌مه‌ریكا رایگه‌یاند: بانكی هودا و خاوه‌نه‌كه‌ی به‌ناوی حه‌مه‌د ئه‌لمووسه‌وی خرانه نێو لیستی سزادراوانی وه‌زاره‌تی گه‌نجینه‌ی ئه‌مه‌ریكا.
راشیگه‌یاند: بانكی هودا و خاوه‌نه‌كه‌ی له ماوه‌ی رابردوودا كاری خراپی ساخته‌كاری و سپیكردنه‌وه‌ی پاره‌یان بۆ ئێران هه‌روه‌ها گرووپه چه‌كداره‌كان بۆ پشتیوانیكردن له تیرۆر ئه‌نجامداوه.
ئه‌مه له‌كاتێكدایه كه هه‌فته‌ی رابردووش فه‌رمانگه‌ی كۆنتڕۆڵكردنی سه‌روه‌ت و سامانی بیانی (OFAC) سزای به‌سه‌ر كۆمپانیای فڕۆكه‌وانی فلای به‌غدا و به‌ڕێوه‌به‌ره‌كه‌ی سه‌پاند به‌هۆی هاوكاریكردنی سوپای پاسدارانی ئێران و گرووپه چه‌كداره‌كان له گواستنه‌وه‌ی چه‌ك و ته‌قه‌مه‌نی و چه‌كدارانه‌وه.
فه‌رمانگه‌كه هه‌روه‌ها سزای سه‌پاندبوو به‌سه‌ر سێ له سه‌ركرده‌كانی كه‌تائیبی حزبوڵای عێراقی به‌هه‌مان مه‌به‌ستی گواستنه‌وه و سپیكردنه‌وه‌ی پاره بۆ ئه‌نجامدانی كاری تیرۆریستی.
کۆمێنت (0)
تا ئێستا هیچ کۆمێنتێک نەکراوە.