ئه‌مڕۆ دووشه‌م سەبارەت بە بڕیارى مەسرور بارزانى سەرۆکى حکوومەتى هەرێمى کوردستان لە بارەى ڕەخساندنى دەرفەتى کار بە ڕێژەى لە 75% بۆ هاووڵاتییانى هەرێمى کوردستان لە کەرتى تایبەت و دەستەبەرى کۆمەڵایەتى و دابینکردنى ئاسایشى کار و نەفەوتانى مافەکانی کرێکاران و چاودێریکردنى خاوەنکار و پڕۆژەکان، كۆبوونه‌وه‌یه‌ك ئه‌نجامدرا.
كۆبوونه‌وه‌كه بە سەرپەرشتى ئومێد خۆشناو پارێزگارى هەولێر و د.عەبدولحەکیم خەسرۆ سەرۆکى فەرمانگەى هەماهەنگى و بەدواداچوونى حکوومەتى هەرێم لە دیوانى پارێزگای هه‌ولێر به‌ڕێوه‌چوو.
لە کۆبوونەوەکەدا تیشکخرایە سەر میکانیزمى جێبەجێکردنى بڕیارى سەرۆکى حکوومەت و جەخت لە جێبەجێکردنى بڕیارى ژمارە (172)ى سەرۆکایەتى ئەنجوومەنى وەزیرانى هەرێمى کوردستان و ڕێنماییە تایبەتییەکانى کرایەوە، بۆ ئەم مەبەستەش سەرجەم لایەنە پەیوەندارەکان ڕاسپێردران هاوکار و هەماهەنگى بەڕێوەبەرایەتى گشتیى دەستبەرى کۆمەڵایەتى بن لەپێناو جێبەجێکردنى بڕیارى ناوبراو لە سەرەتاى ساڵى نوێوە.
لە تەوەرێکى ترى کۆبوونەوەکەدا، تەئکید لە پاراستنى مافى کرێکاران لە هەموو بوارەکانى پەیوەست بە پرۆسەى کارکردن و پاراستنى بەرژەوەندییەکانیان کرایەوە.
هەروەها دووپات کرایەوە کە لەسەر هەموو فەرمانگە و دامەزارەوە و لایەنە پەیوەندارەکان پێویستە بەردەوامبن لە چاودێریکردنى خاوەنکار و پڕۆژەکان، لەپێناو دەستەبەرى کۆمەڵایەتى و دابینکردنى ئاسایشى کار و نەفەوتانى مافى کرێکاران.
کۆمێنت (0)
تا ئێستا هیچ کۆمێنتێک نەکراوە.