وه‌زاره‌تی گواستنه‌وه‌ی عێراق ڕایگه‌یاند كه به بڕیارێك نرخی پلیتی فڕۆكه‌یان بۆ كه‌مئه‌ندام و خاوه‌ن پێداویستی تایبه‌ت بۆ 50% كه‌مكردۆته‌وه.
له به‌یاننامه‌یه‌كی وه‌زاره‌ته‌كه‌دا كه ئه‌مڕۆ سێشه‌م بڵاو كراوه‌ته‌وه هاتووه: له‌سه‌ر فه‌رمانی محه‌مه‌د شیاع سوودانی سه‌رۆك وه‌زیرانی عێراق، بڕیاردرا كه‌مئه‌ندام و خاوه‌ن پێداویستی تایبه‌ت له كاتی گه‌شتی ئاسمانیدا ته‌نیا 50% نرخی پلیتی فڕۆكه بده‌ن و ئه‌م داشكانه‌ش دووجار له ماوه‌ی ساڵێكدا ده‌یانگرێته‌وه.
هه‌روه‌ها هاتووه: بڕیاریشدرا له سه‌رجه‌م فڕۆكه‌خانه‌كان ڕێگه و ئۆتۆمبێلی تایبه‌ت و كورسی دانیشتنی تایبه‌ت بۆ كه‌مئه‌ندام و خاوه‌ن پێداویستی تایبه‌ت ته‌رخان بكرێت و هه‌روه‌ها له كاتی ئه‌نجامدانی گه‌شتكردنیشدا له‌نێو فڕۆكه هه‌موو ئاسانكارییه‌كیان پێشكه‌ش بكرێت.
به‌گوێره‌ی دوایین ئاماری وه‌زاره‌تی ته‌ندروستی عێراق ڕێژه‌ی 15%ی هاووڵاتییانی عێراق كه ده‌كاته نزیكه‌ی 6 ملیۆن كه‌س كه‌مئه‌ندام و خاوه‌ن پێداویستی تایبه‌تن یاخود له‌نێو ماڵه‌كانیان كه‌مئه‌ندام و خاوه‌ن پێداویستی تایبه‌ت هه‌یه و به‌ده‌ستییه‌وه ده‌ناڵێنن.
کۆمێنت (0)
تا ئێستا هیچ کۆمێنتێک نەکراوە.