له ئه‌نجامی ئاگره‌كه‌ی ئه‌مشه‌وی باڵه‌خانه‌یه‌كی نیشته‌جێبوون له شاری سۆران، 9 كه‌س گیانیان له‌ده‌ستداوه و ژماره‌یه‌كی زۆریش بریندار بوون.
دكتۆر كامه‌ران شێروانی به‌ڕێوه‌به‌ری گشتی ته‌ندروستی سۆران تایبه‌ت به (كوردستان تیڤی) ڕاگه‌یاند: ئاگره‌كه پێش كاتژمێر 8ی ئه‌مشه‌و له نهۆمی خواره‌وه‌ی باڵه‌خانه‌كه له سۆران كه‌وتۆته‌وه و دواتریش ئاگره‌كه بۆ نهۆمه‌كانی سه‌ره‌وه به‌رز بۆته‌وه.
ڕاشیگه‌یاند: به‌گوێره‌ی زانیارییه سه‌ره‌تاییه‌كان 9 له هاووڵاتییان له ئه‌نجامی ئاگره‌كه گیانیان له‌ده‌ستداوه و 13ی تریش گه‌یه‌نراونه‌ته نه‌خۆشخانه.
هه‌روه‌ها ڕایگه‌یاند: نهۆمه‌كانی سه‌ره‌وه‌ی باڵه‌خانه‌كه نیشته‌جێبوونه و به‌شێك له قوتابی و كرێكار و هاووڵاتی ئاساییش تێدا هه‌بووه.
جه‌ختیشی كرده‌وه كه ژماره‌یه‌كی زۆری هاووڵاتی تریش هێشتا له‌نێو باڵه‌خانه‌كه ماون و تیمه‌كانی به‌رگریی شارستانی خه‌ریكی ده‌رهێنانیانن.
لای خۆشییه‌وه گوته‌بێژی به‌رگریی شارستانی سۆران ڕایگه‌یاند كه ئێستا ئاگره‌كه له‌لایه‌ن تیمه‌كانیانه‌وه كۆنتڕۆڵكراوه و خه‌ریكی ده‌رهێنانی قوربانییه‌كانن له‌نێو باڵه‌خانه‌كه‌دا.
کۆمێنت (0)
تا ئێستا هیچ کۆمێنتێک نەکراوە.