ئێواره‌ى ئه‌مڕۆ پێنجشه‌م نێچيرڤان بارزانى سه‌رۆكى هه‌رێمى كوردستان له دوبه‌ى له‌سه‌ر بانگهێشتى هاوبه‌شى خاوه‌نشكۆ شا چارلزى سێيه‌م شاى شانشينى يه‌كگرتوو و شێخ محه‌مه‌د بن زايد ئال نه‌هيان سه‌رۆكى ئيمارات له‌گه‌ڵ سه‌رۆك و سه‌ركرده‌ى وڵاتان، به‌شدارى له ڕێوڕه‌سمێكى تايبه‌تى پێشوازيى ژماره‌يه‌ك له سه‌ركرده‌ى وڵاتان و به‌شدارانى كۆنفرانسى نه‌ته‌وه‌يه‌كگرتووه‌كان بۆ گۆڕانى كه‌شوهه‌وا (COP28)دا كرد.
ڕێوڕه‌سمه‌كه بۆ كردنه‌وه‌ى كۆڕبه‌ندى كارى خێرخوازى و گۆڕانى كه‌شوهه‌وايه كه له‌گه‌ڵ كاره‌كانى (COP28)دا له‌لايه‌ن سه‌رۆكايه‌تيى ئيمارات بۆ كۆنفرانس و ده‌ستپێشخه‌ريى بازاڕى به‌رده‌وامه‌وه ساز ده‌كرێت.
ژماره‌يه‌ك له سه‌رۆك و سه‌ركرده‌ى ئه‌و وڵاتانه و ميوانان بانگهێشتى ڕێوڕه‌سمى ئه‌م ئێواره‌يه كراون كه سبه‌ى به‌شدارى له كۆبوونه‌وه‌كانى لووتكه‌ى دوو ڕۆژى يه‌كه‌مى كۆنفرانسه‌كه‌دا ده‌كه‌ن.
ڕێوڕه‌سمه‌كه له‌گه‌ڵ كردنه‌وه‌ى (COP28)دا دێت كه ئه‌مڕۆ به به‌شدرايى سه‌رۆك و سه‌ركرده‌ى وڵاتان و ميوانانى باڵا و شاره‌زايان ده‌ست پێ ده‌كات و تا 12ی ئه‌م مانگه به‌رده‌وام ده‌بێت. تيايدا وڵاتان و نه‌ته‌وه‌يه‌كگرتووه‌كان و ئاژانس و ڕێكخراوه‌كانى ئه‌م بواره و كه‌ر‌تى تايبه‌ت، لێكۆڵينه‌وه و گفتوگۆ ده‌رباره‌ى هه‌ڕه‌شه و مه‌ترسييه‌كانى گۆڕانى كه‌شوهه‌وا و پلان و ڕێكاره‌كانى ڕووبه‌ڕووبوونه‌وه‌يان له‌سه‌ر ئاستى جيهان ده‌كه‌ن.
کۆمێنت (0)
تا ئێستا هیچ کۆمێنتێک نەکراوە.