تا کۆتایی ئەم مانگە پرۆسەی هەژماری من لەسنوری پارێزگای هەولێر کۆتایی دێت و مانگی داهاتوو پرۆژەکە لە شاری سلێمانی و دهۆک دەست پێ دەکات.
دوای ئه‌وه‌ی له‌چه‌ند رۆژی رابردوو، ئاوات جەناب نوری، وەزیری دارایی و ئابووری هەرێمی کوردستان، بە مەبەستی ئاگاداربوون لە بەڕێوەچوونی کارەکانیان، بەشێوەیەکی مەیدانی تیمەکانی پرۆژەی هەژماری منی لە کۆیە بەسەرکردەوەو دەستخۆشی لێ کردن بەشێوەیەکی خێرا و ورد پرۆسەکەیان بەڕێوەبردووە کە وادەکات بەر لەوادەی خۆی کارەکانیان تەواو بکەن.
وەزیری دارایی ڕایگەیاند:" تا کۆتایی ئەم مانگە پرۆسەی هەژماری من لەسنوری پارێزگای هەولێر کۆتایی دێت و مانگی داهاتوو پرۆژەکە لە شاری سلێمانی و دهۆک دەست پێ دەکات".
بەپێی داتای تیمەکانی پرۆژەی هەژماری من تا ئێستا نزیکەی 165 هەزار فەرمانبەری حکومەتی هەرێمی کوردستان هەژماری بانکیان بۆ کراوەتەوە و تا سەرەتای مانگی داهاتوو سەرجەم فەرمانبەرانی سنوری پارێزگای هەولێر دەبنە خاوەن هەژماری من.
بڕیارە لە ساڵی داهاتوودا کۆمپانیاکانی کەرتی تایبەتیش مووچەکانیان بگوازنەوە بۆ بانکە تایبەتەکان و کارمەندەکانیان لەڕێگەی هەژماری بانکیەوە مووچەکانیان وەربگرن.
لەدرێژەی هەنگاوەکانی پرۆژەکەدا لەسەرەتای ساڵی داهاتوو دەست دەکرێت بەدانانی ئامێری پارە ڕاکێشان ( ATM ) لە شوێنە گشتی و بازرگانیەکان و فەرمانبەران و مووچەخۆرانیش دەتوانن سودمەند ببن لەچەندین خزمەتگوزاری بانکی جۆراو جۆر.
کۆمێنت (0)
تا ئێستا هیچ کۆمێنتێک نەکراوە.