ئەنجوومەنی بەڕێوەبەرایەتیی گشتیی پەروەردەی سلێمانی داوای كرد رۆژی دووشه‌می هه‌فته‌ی داهاتوو ده‌رگه‌ی قوتابخانه‌كان له سلێمانی بكرێنه‌وه و بۆ ئه‌م مه‌به‌سته داواشی له مامۆستایان كرد بچنه‌وه هۆڵه‌كانی خوێندن.
ئەمڕۆ پێنجشەم لە بەیاننامەیەكدا ئەنجوومەنی بەڕێوەبەرایەتیی گشتیی پەروەردەی سلێمانیدا ڕایگه‌یاند: ئەنجوومەن كۆبوونەوەی ئاسایی خۆی ئەنجام دا و بەكۆی دەنگ، داوا لە مامۆستایان كرا ڕۆژی دووشەم بگەڕێنەوە هۆڵەكانی خوێندن.
ڕاشیگه‌یاند: دوای زیاتر لە دوو مانگ لە داخستنی لە ناوەندەكانی خوێندن لە سنووری پارێزگه‌ی سلێمانی و لە پەرۆشیمان و هەستكردن بە مەترسیی زیاتری ئەم دۆخە، داوا دەكەین سەرباری قورسی و سەختی بارودۆخ بە گشتی بە تایبەتی گوزەرانی مامۆستایان، بۆ ئەمجارەش هەمووان پێكەوە شان بدەینە بەر بەرپرسیارێتی و دەرگه‌ی ناوەندەكانی خوێندن بكەینەوە و خوێندكاران لەوە زیاتر خوێندنیان نەفەوتێت.
ئەنجوومەنی بەڕێوەبەرایەتیی گشتیی پەروەردەی سلێمانی داواشی لە مامۆستایانی میلاك و وانەبێژ كرد روو بكەنەوه ناوەندەكانی خوێندن. جه‌ختیشی كرده‌وه كه ئەوانیش بەردەوام دەبن لە پشتیوانیكردنیان له داواكانیان.
کۆمێنت (0)
تا ئێستا هیچ کۆمێنتێک نەکراوە.