ژن و پیاوێك دەستگیركران كە سێ منداڵیان بەرامبەر بە بڕە پارەیەك فرۆشتووە

موقەدەم شاخەوان محەمەد ،بەڕێوەبەری نووسینگەی بەرەنگاربوونەوەی تاوان لە رێكخراوەكانی گەرمیان رایگەیاند: لەماوەی رۆژانی پێشوودا كەسێك كە منداڵێكی لە خێزانێك كڕیوە سكاڵای لەدژی دایك و باوكی منداڵەكە تۆماركردووە كە منداڵەكەیان پاش فرۆشتن بردووەتەوە بێ ئەوەی پارەكە بگەڕێننەوە.
هەروەها گوتی: لەسەر فەرمانی دادوەر دایك و باوكەكە دەستگیركراون و پاش دەستگیركردن و لێكۆڵینەوە دەركەوتووە هەمان ژن و مێرد پێشتر جگە لەم منداڵەیان دوو منداڵی دیكەیان فرۆشتووە.
موقەدەم شاخەوان ئاشكراشیكرد، ئەو منداڵانە لە تەمەنی 3 مانگی، 11 مانگی و یەك ساڵی هەر یەكێكیان لەبەرامبەر ملیۆنێك دینار تاوەكو 1500 دۆلار فرۆشراون.
بەپێی یاسای ژمارە شەشی ساڵی 2018 كە لە پەرلەمانی كوردستانی عێراق دەرچووە، بەپێی یاساكە كڕین و فرۆشتن بە مرۆڤەوە قەدەغەیە.