وه‌زاره‌تی به‌رگریی ئه‌مه‌ریكا (پێنتاگۆن) ئاشكرای ده‌كات كه له 17ی ئۆكتۆبه‌ره‌وه تا ئێستا 38 جار هێرش كراوه‌ته سه‌ر سه‌ربازگه‌كانیان له عێراق و سووریا.
پاتریك رایده‌ر گوته‌بیژی پێنتاگۆن ئه‌مڕۆ دووشه‌م ڕایگه‌یاند: له 17ی ئۆكتۆبه‌ری ڕابردووه‌وه تا ئێستا هێزه‌كانی سوپای ئه‌مه‌ریكا له عێراق و سووریا 38 جار هێرشیان كراوه‌ته سه‌ر و به‌هۆیه‌وه 45 سه‌رباز و فه‌رمانبه‌ر به سووكی بریندار بوون.
شه‌وی رابردووش ئه‌نتۆنی بلینكن وه‌زیری ده‌ره‌وه‌ی ئه‌مه‌ریكا له میانه‌ی سه‌ردانه‌كه‌ی بۆ به‌غدا هۆشداری توندی دایه ملیشیاكان و په‌یامێكی ڕوونی ئاراسته‌كردن كه ئه‌و كاره‌ی ئه‌وان ده‌یكه‌ن به‌هیچ شێوه‌یه‌ك قبووڵكراو نییه.
بلینكن جه‌ختیشی كردبووه‌وه كه ئه‌وان وه‌ك ئه‌مه‌ریكا هه‌موو رێكارێك ده‌گرنه‌به‌ر بۆ پاراستنی هاووڵاتییان و سه‌ربازه‌كانیان له عێراق و سووریا.
وه‌زیری ده‌ره‌وه‌ی ئه‌مه‌ریكا هه‌ر له میانه‌ی سه‌ردانه‌كه‌یدا به جلوبه‌رگی گولـله‌نه‌بڕ و به رێكارێكی توندی ئه‌منی و هه‌ستیاردا له ناوچه‌ی سه‌وزی به‌غدای پایته‌خت سه‌ردانی باڵیۆزخانه‌ی وڵاته‌كه‌ی كرد و چاوی به به‌رپرسانی باڵیۆزخانه‌كه و به‌شێك له سه‌ربازان وڵاته‌كه‌ی له عێراق كه‌وت.
کۆمێنت (0)
تا ئێستا هیچ کۆمێنتێک نەکراوە.