كه‌تائیبی حزبوڵای عێراقی ئه‌مڕۆ پێنجشه‌م په‌یامێكی هه‌ڕه‌شه‌ی ئاراسته‌ی ئیسڕائیل كرد و جه‌ختی كرده‌وه كه بۆ ماوه‌ی چه‌ندین ساڵ توانای شه‌ڕكردنیان دژی سوپای ئیسڕائیل هه‌یه.
كه‌تائیبی حزبوڵای عێراقی به‌یاننامه‌یه‌كی به‌ناوی ئه‌بوو عه‌لی عه‌سكه‌ری به‌رپرسی ئه‌منی كه‌تیبه‌كه بڵاو كرده‌وه: گه‌لی عێراق له ڕێی خۆپیشاندان و ناڕه‌زایه‌تییه‌كان جارێكی تر دووپاتی ده‌كاته‌وه كه له پێشه‌نگی ئه‌و گه‌لانه‌یه كه بڕوای ته‌واوی به مافه‌كانی گه‌لی فه‌ڵه‌ستین هه‌یه.
ڕاشیگه‌یاند: كه‌تائیبی حزبوڵای عێراقی بڕوای ته‌واوی به تواناكانی خۆی هه‌یه و ده‌توانێ بۆ ماوه‌ی چه‌ند ساڵێك شه‌ڕ دژی سوپای ئیسڕائیل بكات و سه‌ركه‌وتنی گه‌وره‌ش به‌ده‌ستبێنێ.
به‌رپرسه ئه‌منییه‌كه‌ی كه‌تائیبی حزبوڵای عێراقی ئاماژه‌ی به‌وه‌ش دا كه ئه‌وان به‌رده‌وام ده‌بن له چالاكییه‌كانیان دژی ئیسڕائیل و هاوپه‌یمانه‌كانی و چالاكییه‌كانیشیان به‌شێوه‌ی قۆناغ به قۆناغ ده‌بێت و ڕووبه‌رێكی فراوانتر و لێدانی به‌هێزتر ده‌گرێته‌وه.
داواشی له ئیسڕائیل كرد هه‌ر ئێستا واز له كوشتنی خه‌ڵكی بێتاوانی غه‌ززه بهێنێ و گه‌ماڕۆكانی سه‌ریان هه‌ڵبگرێ و ده‌ستبه‌رداری دروشمی ئاواره‌كردنی هاووڵاتییان سڤیل بن.
ئه‌مه له‌كاتێكدایه كه له ماوه‌ی چه‌ند رۆژی ڕابردوودا به ئامانجگرتن و تۆپبارانی سه‌ربازگه و بنكه سه‌ربازییه‌كانی ئه‌مه‌ریكا له عێراق زیادیان كردووه به‌هۆی پاڵپشتییه‌كانی ئه‌و وڵاته له هێرشه‌كانی ئیسڕائیل بۆ سه‌ر غه‌ززه و گرووپه چه‌كداره‌كانی فه‌ڵه‌ستین.
کۆمێنت (0)
تا ئێستا هیچ کۆمێنتێک نەکراوە.