گوتەبێژی حکوومەتی هەرێمی کوردستان لەبارەی مووچەی فەرمانبەرانی هەرێمی کوردستان دەڵێت، تاوەکوو ئەو ڕۆژەش کە حکوومەتی هەرێمی کوردستان نەوتی خۆی فرۆشتووە فەرمانبەرانی هەرێمی کوردستان ئەم سەختی و ناڕەحەتییەیان نەبینی کە ئێستا ڕووبەڕوی بوونەتەوە.
ئەمڕۆ چوارشەممە 25ـی 10ـی 2023 کۆبوونەوەی ئەنجوومەنی وەزیران بە سەرپەرشتی مەسرور بارزانی سەرۆکی ئەنجوومەن و ئامادەبوونی جێگری سەرۆک وەزیران بەڕێوەچوو، پێشەوا هەورامانی گوتەبێژی حکوومەتی هەرێمی کوردستان ڕایگەیاند: سەرۆکی حکوومەت ئەمڕۆش دووبارە تیمی حکوومەتی ڕاسپارد کە بەو پەڕی شەفافی و ئامادەییەوە هەماهەنگی بکەن لەگەڵ تیمی حکوومەتی فیدراڵ بۆ چارەسەری کێشەکان و نەهێشتنی هیچ دوو دڵییەک لەلایان.
ڕاشیگەیاند: شاندی هەرێمی کوردستان ڕاپۆرتێکی 30 لاپەڕەیی پێشکەش کردووە و ڕوون و شەفاف وەڵامی هەموو شتێکی تێدا دراوەتەوە و لە کۆبوونەوەی شاندی حکوومەتیش لەگەڵ لێژنەی دارایی پەرلەمان 28 پرسیار وەڵامیان دراوەتەوە و هەندێک پەرلەمانتاری عێراق گوتوویانە ئێمە پێشتر نەمانزانیوە بابەتەکان بەمجۆرەن.
پێشەوا هەورامانی جەخت دەکاتەوە کە "دابینکردنی مووچەی فەرمانبەرانی هەرێمی کوردستان ئەرکێکی دەستووری حکوومەتی فیدراڵە وەک هەموو ناوچەیەکی دیکەی عێراق خەرجی بکات و مووچە لە هەموو پرسێکی دیکە جیابکرێتەوە و وەک بارمتەیەکی سیاسی مامەڵەی لەگەڵ نەکرێت، تاوەکوو ئەو ڕۆژەش کە حکوومەتی هەرێمی کوردستان نەوتی خۆی فرۆشتووە فەرمانبەرانی هەرێمی کوردستان ئەم سەختی و ناڕەحەتییەیان نەبینی کە ئێستا ڕووبەڕوی بوونەتەوە."
گوتەبێژی حکوومەتی هەرێمی کوردستان ئاماژەی بەوەش داوە کە "ئەرکی هەموو لایەنە سیاسییەکانی هەرێمی کوردستانیشە یاری سیاسی بەم بابەتە نەکەن و یەکدەنگ و یەکهەڵوێست داوای مافی میللەتەکەمان بکەن."
کۆمێنت (0)
تا ئێستا هیچ کۆمێنتێک نەکراوە.