له‌ ئۆڵۆمپیادی باڵتیك هه‌ڵپه‌ڕكێی كوردیی خه‌ڵاتی دووه‌می به‌ده‌ستهێنا

رۆژی سێشەممە 24ی تشرینی یەکەمی 2023، ئه‌و تیپه‌ی كچانی ڕووس، كه‌ له‌ ئۆڵۆمپیادی باڵتیك بۆ سه‌ما و هه‌ڵپه‌ڕكێی كلتووری، تابلۆیه‌كی هه‌ڵپه‌ڕكێی كوردییان نمایش كرد، خه‌ڵاتی دووه‌می ئۆڵۆمپیادیان پێ به‌خشرا.

ئۆڵمپیادی باڵتیک بۆ سه‌ما و هەڵپەڕکێ، له‌ 19 تا 22ـی تشرینی یه‌كه‌می 2023، له‌ شاری سان پترسبۆرگـی ڕووسیا به‌ڕێوه‌چوو.

له‌ 8 وڵاتی جیهانه‌وه‌ زیاتر له‌ 2 هه‌زار و 500 كه‌س به‌شداریان له‌ خولی هه‌شته‌می ئۆڵۆمپیاده‌كه‌دا كرد.

له‌ چوارچێوه‌ی چالاكییه‌كانی ئۆڵۆمپیاده‌كه‌دا پێشانگه‌یه‌كی تایبه‌ت به‌ سه‌ما به‌ ناوی "Dance EXPO" كرایه‌وه‌.

ئه‌وه‌ی جێی سه‌رنجی ئاماده‌بووان و لیژنه‌ی هه‌ڵسه‌نگێنه‌ری ئۆڵۆمپیاده‌كه‌ بوو، ئه‌و تابلۆ هونه‌رییه‌ كوردییه‌ بوو، كه‌ تیپێك له‌ كچانی ڕووس پێشكه‌شیان كرد و به‌ هۆیه‌وه‌ توانیان پله‌ی دووه‌می ئۆڵۆمپیاده‌كه‌ به‌ده‌ستبهێنن.

تیپه‌ هونه‌رییه‌كه‌ی كچانی ڕووس، پێشتر له‌ لایه‌ن حه‌مه‌ی حه‌مه‌سه‌عید، وه‌زیری ڕۆشنبیری و لاوانی حكومه‌تی هه‌رێمی كوردستانه‌وه‌ له‌ چوارچێوه‌ی سه‌ردانه‌كه‌ی بۆ مۆسكۆ و به‌شداریكردنی له‌ سێیه‌م وه‌شانی فێستیڤاڵی نێوده‌وڵه‌تی فیلمی كوردی مۆسكۆ، خه‌ڵاتی ڕێزلێنانی وه‌زاره‌تی پێ به‌خشین.