لە هەرێمی کوردستان ساڵانە 500 ملیار دینار لە بەرهەمهێنانی ئاوی خواردنەوە خەرج دەکرێت

پڕۆژەکانی بەرهەمهێنانی ئاوی پاک لە هەرێمی کوردستان، لە ڕۆژێکدا 3 ملیۆن مەتر سێجا ئاوی خواردنەوە بە پێوەرى جیهانی بەرهەم دێنن و لە ڕێگەى پرۆژە جیاجیاکانەوە دەگەیەنرێتە ماڵان.
ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان، لەمبارەیەوە بە فەرمانگەى میدیا و زانیاریی ڕاگەیاند: "توانای بەرهەمهێنانی پرۆژە و بیرەکانی ئاو لە هەرێمی کوردستان لە ڕۆژێکدا زیاتر لە سێ ملیۆن مەتر سێجا ئاوە؛ ئەوەش لە وەرزێک بۆ وەرزێکی تر دەگۆڕێت. ئەو ئاوەی بەرهەم دێت لە بیرەکان و پرۆژەکان و کانییەکان هەر هەمووی دوای پشکنین و دڵنیابووەنەوە، بە گوێرەی ستانداردەکانی ڕێکخراوی تەندروستیی جیهانی و ستانداردی عێراقی بۆ ئاوی خواردنەوە بەکار دێت."
ئاری ئەحمەد دەشڵێت: ''پرسی پاککردنەوەى ئاو پرسێکی فیزیایی و کیمیاییە، زیاتر لە 10 پشکنینی کیمیایی و 4 پشکنینی فیزیایی و 3 پشکنینی بایۆلۆجی بۆ دەکرێت. تێچووی ئەم پرۆسەیە بۆ هەموو هەرێمی کوردستان ساڵانە 500 ملیار دینارە."
هیوا عەبدولرەزاق، سەرپەرشتیاری ئاوی ئیفرازی سێ ڕایگەیاند: ''سەبارەت بە پاککردنەوەى ئاو لە پرۆژەی ئاوی ئیفرازی سێ کە سەرچاوەکەى زێی گەورەیە، بە 5 قۆناغ ئاوەکە پاک دەکرێتەوە. لە ڕووبارەکە وەردەگیرێت و بە چەند پەمپێکی گەورە ئاوەکان دەهێنرێنە ناو پرۆژەکە و لەوێوە بە 5 پرۆسە کاری لەسەر دەکرێت، تا بۆ هاووڵاتییان دەنێردرێت.''
سەرپەرشتیاری ئاوی ئیفرازی سێ هێمای بۆ ئەوەش کرد، لە پرۆژەی ئاوی ئیفرازی سێ هیچ کێشەیەک نییە و ئەو ئاوەی کە پاکیش دەکرێتەوە، بە گوێرەی ستانداردی جیهانییە."
بەپێی ڕاپۆرتێکی نەتەوە یەکگرتووەکان لە ساڵی 2023، لە جیهاندا نزیکەى 2 ملیار کەس کێشەى دەستڕاگەیشتن بە ئاوى خواردنەوەیان هەیە، ئەم دیاردەیەش لەگەڵ زیادبوونی دانیشتووان و وشکەساڵی زیاتر بووە. حکومەتی هەرێمی کوردستان بۆ پاراستنی ئاو و گەیاندنی ئاوی پاک بە هاووڵاتییان، سیاسەتی گەشەپێدانی پرۆژە ئاوییەکانی لەسەر بنەماى زانستی گرتووەتە بەر.