شارەزایەکی بواری کەشناسی پێشبینییەکانی بۆ ڕەوشی کەشوهەوای ڕۆژانی چوارشەممە و پێنجشەممە خستووەتەڕوو و ئاماژەی بەوە داوە کە لە هەندێک ناوچە ئەگەری بارانبارین هەیە.
ئاراس جەبار، شارەزای بواری کەشناسی سەبارەت بە کەشوهەوای سبەی چوارشەممە 18ـی 10ـی 2023 ڕایگەیاند: ئاسمانی ھەرێمی کوردستان بەزۆری لەنێوان ساماڵ و پەڵە ھەوردا دەبێت.
ڕاشیگەیاند: لە ناوچە شاخاوییە سنورییەکانی پارێزگاکانی دھۆک و ھەولێر نیمچەھەور دەبێت و ھەندێک کاتیش تاوەباران و برووسکە چالاک دەبێت، هەروەها پلەکانی گەرما جێگیر دەبێت و خێرایی با لەسەرخۆ 10-15 کیلۆمەتر لە کاتژمێرێک دەبێت.
سەبارەت بە ڕەوشی کەشوهەوای دووسبەی پێنجشەممە ئاراس جەبار گوتی: لە ئەنجامی پێشڕەوی زیاتری نزمەپاڵەپەستۆی باکور لەسەر ناوچەکانمان دووسبەی پێنجشەممە لە ناوچەکانی سنووری پارێزگای دھۆک و ناوچە شاخاوییەکانی پارێزگای ھەولێر بارانی مامناوەند و پچڕپچڕ دەبارێت.
ئەو شارەزایەی کەشناسی هەر سەبارەت بە کەشوهەوای ڕۆژی پێنجشەممە ئاماژەی بەوە دا کە لە ناوچەکانی دیکەی ھەرێمی کوردستان کاریگەری لاواز دەبێت و زیاتر ئاسمان ھەوراوی دەبێت لەگەڵ ئەگەری نمەباران بۆ بارانێکی کەم لە ھەندێ شوێن و ناوچەدا.
کۆمێنت (0)
تا ئێستا هیچ کۆمێنتێک نەکراوە.