باڵیۆزخانه‌ی ئه‌مه‌ریكا له هایتی بڕیاری دا ده‌رگه‌ی باڵه‌خانه‌ی باڵیۆزخانه‌كه‌ی دابخات و تا كاتێكی نادیار چوونه ده‌ره‌وه له فه‌رمانبه‌ران قه‌ده‌غه بكات، به‌هۆی شه‌ڕه ته‌قه و سه‌رهه‌ڵدانی توندوتیژی له ناوچه‌یه‌كی نزیكی باڵیۆزخانه‌كه‌یان.
باڵیۆزخانه‌ی ئه‌مه‌ریكا له هایتی له ئاگاداركردنه‌وه‌یه‌كی ئه‌منیدا ڕایگه‌یاند: هه‌ندێ له ڕێگه‌كانی هاتن بۆ باڵیۆزخانه‌كه‌مان له هایتی به‌هۆی ڕووبه‌ڕووبوونه‌وه و ته‌قه‌كردنه‌وه مه‌ترسی له‌سه‌ر دروست بووه.
ڕاشیگه‌یاند: به‌هۆی مه‌ترسییه‌كان بڕیارمان دا ده‌رگه‌ی باڵه‌خانه‌كه‌مان تا كاتێكی نادیار دابخه‌ین و هاتنه‌ده‌ره‌وه له‌سه‌ر فه‌رمانبه‌ران قه‌ده‌غه بكه‌ین.
ئه‌مه له‌كاتێكدایه كه له دوێنێ دووشه‌مه‌وه خۆپیشاندانه‌كانی هایتی له‌نێوان خۆپیشانده‌ران و هێزه‌كانی پۆلیس گرژی تێكه‌وتووه.
خۆپیشانده‌رانی هایتی داوایان له حكوومه‌تی وڵاته‌كه‌یان كردووه سنوورێك بۆ توندوتیژی و كوشتن و بڕینی گرووپه مافیاكان دابنێن كه له‌ماوه‌ی ڕابردوودا ده‌ستدرێژی و ڕێگری و ڕفاندن و كوشتنێكی زۆریان له وڵاته‌كه ئه‌نجامداوه.
کۆمێنت (0)
تا ئێستا هیچ کۆمێنتێک نەکراوە.