نرخی دۆلار لە بەرزبوونەوەدایە

نرخی دۆلار لە عێراق و هەرێمی کوردستان لە بەرزبوونەوەدایە، ئەمەش بەهۆی سەپاندنی سزا بەسەر چەند بانکێک لەلایەن ئەمریکاوە.

ئەمڕۆ شەممە 22ـی 07ـی 2023 نرخی دۆلار لە کاتی داخستنی بازاڕەکانی دراو لە هەرێمی کوردستان بە 151 هەزار و 500 دینار مامەڵەی پێوە کرا، لە بەغداش بە 151 هەزار و 400 دینار مامەڵەی پێوە کرا، ئەمە لەکاتێکدایە کە لە کاتی کردنەوەی بازاڕەکانی دراو بە 151 هەزار و 250 دینار مامەڵەی پێوە دەکرا.

نرخی دۆلار ئەمڕۆ جێگیر نەبوو، بەردەوام لە گۆڕانکارییدا بوو، لە هەرێمی کوردستان نرخەکەی تاوەکو 151 هەزار و 750 دینار بەرزبووەوە.

ئەمە لەکاتێکدایە کە پەرلەمانی عێراق نرخی 100 دۆلاری بە 130 هەزار دینار لە بودجەی فیدراڵی پەسند كردووە، بەڵام ئێستا بە زیاتر لە 150 هەزار دینار مامەڵەی پێوە دەکرێت.

هەروەها پێشووتر ڕۆژنامەی وۆڵ ستریت جۆرناڵ ڕایگەیاندبوو، ئەمریكا زانیاریی ئاشكرا كردووە كە بانكە عێراقییەكان تێوەگلاون لە سپیكردنەوەی پارە و مامەڵەی ساختە، كە ڕەنگە هەندێكیان كەسانی سزادراوی تێدابێت و نیگەرانییەكانیشی خستۆتەڕوو كە ڕەنگە ئێران سوود لەم مامەڵانە وەربگرێت.

ڕۆژنامەکە ئاماژەی بەوەش دابوو کە واشنتۆن سزا بەسەر 14 بانكی عێراقیدا دەسەپێنێت، بەمەبەستی ڕێگریكردن لە ئەنجامدانی مامەڵەكردنی ساختە بە دۆلار، ئەمەش لە چوارچێوەی هەڵمەتێكی گشتگیر بۆ بەرەنگاربوونەوەی دزەكردنی دراوی ئەمریكی بۆ ئێران دێت.