دژەتیرۆری عێراق كوژرانی پێنج تیرۆریستی داعشی لە پارێزگای كەركووك راگەیاند

دەزگای دژەتیرۆری عێراق رایگەیاند كە لە میانی ئۆپەراسیۆنێكی هێزەكانیاندا لە پارێزگای كەركووك، پێنج تیرۆریستی داعش كوژراون.
سەباح نوعمان، گوتەبیژی دەزگای دژەتیرۆری عێراق، لە راگەیەندراوێكدا ئاماژەی بەوەداوە كە ھێزەكانیان، ئۆپەراسیۆنێكی دابەزاندنی ئاسمانییان بۆسەر حەشارگەیەكی تیرۆریستانی داعش لە نزیك گوندی كتكە سەربە ناحیەی پردێ  لە باكووری پارێزگای كەركووك ئەنجامداوە.
راشیگەیاندووە كە لە میانی ئۆپەراسیۆنەكەدا، پێنج تیرۆریستی داعش كوژراون.
سەباح نوعمان باسی لەوەیش كردووە، تیرۆریستە كوژراوەكان لە ماوەكانی رابردوودا، پەلاماری خاڵێكی ھێزە ئەمنییەكانیان دابوو لەنێوان گوندی مەلا عەبدوڵڵا و ناحیەی ریاز باشووری رۆژئاوای پارێزگای كەركووك كە لە ئاكامدا، ژمارەیەك كارمەندی ئەمنیی كوژران.