ئاسایشی هەولێر کەسێکی دەستگیر کردووە کە کاری دروستکردن ئامێری گزیکردنی کردووە و لە تۆڕە کۆمەڵایەتییەکان بانگەشەی فرۆشتنی بۆ کردووە.
ئەمڕۆ شەممە 03ـی 06ـی 2023 بەڕێوەبەرایەتیی ئاسایشی هەولێر دەستگیرکردنی تۆمەتبارێکی ڕاگەیاند کە کاری دروستكردن و فرۆشتنی ئامێری گزیكردنی دەکرد، لەمبارەیەوە لە ڕاگەیەنراوێک ئاسایشی هەولێر ڕایگەیاند: تیمەكانمان توانییان ناسنامەی تۆمەتبارێک ئاشكرا بكەن كە لە تۆڕە كۆمەڵایەتییەكانەوە بانگەشەی بۆ فرۆشتنی پرسیارەكانی پۆلی 12ـی ئامادەیی و ئامێری گزیكردن (غش) دەكرد، بۆیە لەسەر فەرمانی دادوەری لێكۆڵینەوەی ئاسایشی هەولێر، لەلایەن هێزێكی سەر بە بەڕێوەبەرایەتییەكەمانەوە تۆمەتبار دەستگیر كرا و درایە دادگە.
ئاسایشی هەولێر لە ڕاگەیەنراوەکە داوا لەسەرجەم قوتابییان دەکات، خۆیان لەو كەسانە بەدوور بگرن كە ئەم جۆرە بانگەشەیە دەكەن و كاتی خۆیان و دەرفەتی خوێندنەكەیان لەدەست نەدەن، چونكە ئەو جۆرە ئامێرانە نایاسایین و هیچ سوودێكیش بە قوتابییان ناگەیەنێت.
لە ڕاگەیەنراوەکە جەختی کراوەتەوەش کە ئەم جۆرە ئامێرانە لەلای هەر كەسێكیش بێت، دەستگیر دەكرێت و ڕێكاری یاسایی بەرامبەر دەگیرێتە بەر.
ئاسایشی هەولێر ئاماژەی بەوەش داوە کە "بە هیواین هەمووان پشت بە خۆتان ببەستن و باشترین نمرەش بەدەست بهێنن."
ئەمڕۆ بە بەشداریی زیاتر لە 117 هەزار قوتابیی تاقیکردنەوەکانی پۆلی 12 ئامادەیی بە هەموو بەشەکانییەوە بەڕێوەچوو.
کۆمێنت (0)
تا ئێستا هیچ کۆمێنتێک نەکراوە.