سەرۆكی هەرێمی كوردستان پیرۆزبایی لە یەكێتی نیشتمانی كوردستان دەكات

نێچیرڤان بارزانی، سەرۆكی هەرێمی كوردستان، لە پەیوەندییەكی تەلەفۆنیدا لەگەڵ بافڵ تاڵەبانی، سەرۆكی یەكێتیی نیشتمانیی كوردستان، بۆ یادی (48) ساڵەی دامەزراندنی یەكێتی، پیرۆزبایی لە بەڕێزیان و ئەنجومەنی باڵای سیاسی و بەرژەوەندییەكان و مەكتەبی سیاسی و سەركرایەتی و تەواوی ئەندامان و جەماوەری یەكێتی نیشتمانی كوردستان كرد و هیوای سەركەوتنی بۆ خواستن.
نێچیرڤان بارزانی هەر بەم بۆنەیەوە وێڕای ئاماژەدان بە خەبات و مێژووی یەكێتیی، خوالێخۆشبوو سەرۆك مام جەلال و پێگە و ڕۆڵی بە بیر هێنایەوە و هیوای خواست ئەم یادە ببێتە هاندەری تەبایی و پێكەوەیی و یەكڕیزیی لایەنە سیاسییەكان، بەتایبەتی پارتی و یەكێتی.
لای خۆیەوە سەرۆكی یەكێتی نیشتمانی كوردستان، بە ناوی خۆی و سەركردایەتی یەكێتییەوە، سوپاس و پێزانینی بۆ پیرۆزبایی و پەیوەندیی سەرۆكی هەرێمی كوردستان دەربڕی و هیوای سەركەوتنی بۆ خواست.