ئامارە فەرمییەکان ئاشکرای دەکەن کە ژمارەی ئەو کەسانەی بوومەلەرزەکەی تورکیا و سووریا گیانیان لەدەست داوە ئەمڕۆ چوارشەممە 08ـی 02ـی 2023 بۆ زیاتر لە 11 هەزار و 200 کەس بەرزبووەوە، لەکاتێکدا تاوەکوو ئێستا دەیان هەزار کەس لەژێر داروپەردووی باڵەخانە و خانووەکان گیریان خواردووە.
بەرپرسانی تەندروستی ڕایانگەیاند: 8 هەزار و 574 کەس لە تورکیا، هەروەها 2 هەزار و 662 کەس لە سووریا گیانیان لەدەست داوە، بەمەش کۆی گشتیی ئەو کەسانەی گیانیان لەدەست داوە گەیشتە 11 هەزار و 236.
ڕەجەب تەیب ئەردۆغان سەرۆکی تورکیا دوای سێ ڕۆژ لە ڕووداوەکە ڕایگەیاند: 50 هەزار کەس بەهۆی ڕووداوەکە برینداربوون و چارەسەریان بۆ کراوە.
هەروەها لە سووریا سەرچاوە حکوومی و تەندروستییەکان ئاشکرای دەکەن کە 5 هەزار کەس بەهۆی ڕووداوی بوومەلەرزەکە برینداربوون.
بەرەبەیانی ڕۆژی دووشەممە 06ـی 02ـی 2023 بوومەلەرزەیەک لە تورکیا و سووریا بە گوڕی 7.8 پلەی ڕێختەر ڕووی دا و لە چەندان وڵاتی دیکە بە هەرێمی کوردستانیشەوە هەستی پێکرا، ئەمەش زیانێکی گیانی زۆری بەدوای خۆیدا هێنا.
کۆمێنت (0)
تا ئێستا هیچ کۆمێنتێک نەکراوە.