باڵیۆزخانه‌ی ئه‌مه‌ریكا له شاری به‌غدا سه‌باره‌ت به یارییه‌كه‌ی ئه‌مڕۆی هه‌ڵبژارده‌ی وڵاته‌كه‌یان به‌رامبه‌ر هه‌ڵبژارده‌ی ئێران له مۆندیالی 2022ی قه‌ته‌ڕ ڕایگه‌یاند كه ئه‌وان به ده‌نگی به‌رز و شانازییه‌وه پشتگیری هه‌ڵبژارده‌كه‌یان ده‌كه‌ن.
ئه‌مشه‌و سێشه‌م له كاتژمێر 10:00 به كاتی كوردستان، هه‌ردوو هه‌ڵبژارده‌ی ئه‌مه‌ریكا و ئێران له دوایین گه‌ڕی قۆناغی كۆمه‌ڵه‌كان ڕووبه‌ڕووی یه‌كتر ده‌بنه‌وه، یارییه‌كه‌ش بۆ هه‌ردوو هه‌ڵبژارده یه‌كلاكه‌ره‌وه ده‌بێت و هه‌ر كامیان سه‌ركه‌وتن به‌ده‌ستبێنێ ده‌چێته قۆناغی 16ی یارییه‌كانی مۆندیالی 2022ی قه‌ته‌ڕ.
له‌باره‌ی یارییه‌كه باڵیۆزخانه‌ی ئه‌مه‌ریكا له ڕاگه‌یه‌نراوێكدا ئاماژه‌ی دا: یارییه‌كه‌ی ئه‌مشه‌وی هه‌ردوو هه‌ڵبژارده‌ی ئه‌مه‌ریكا و ئێران یه‌كێك ده‌بێت له پڕبینه‌رترین یارییه‌كانی مۆندیال، به‌تایبه‌تیش بۆ ستافی باڵیۆزخانه‌ی ئه‌مه‌ریكا له به‌غدا.
ڕاشیگه‌یاند: ئێمه به‌ده‌نگی به‌رز و شانازییه‌وه پشتگیری هه‌ڵبژارده‌ی وڵاته‌كه‌مان ده‌كه‌ین و هاوار بۆ سه‌ركه‌وتنی هه‌ڵبژارده‌ی ئه‌مه‌ریكا ده‌كه‌ین.
باڵیۆزخانه‌ی ئه‌مه‌ریكا هه‌روه‌ها ڕایگه‌یاند: ناشی شارنه‌وه كه هه‌موو هه‌ڵبژارده‌یه‌ك مافی خۆیه‌تی یاری بۆ گه‌له‌كه‌ی بكات بۆ ئه‌وه‌ی شانازی پێوه بكات و ناویان به‌رز بكاته‌وه.
ئاماژه‌ی به‌وه‌ش دا: ئه‌مشه‌و ده‌بینین كه چۆن وه‌رزش ده‌توانیت سیاسه‌ت تێپه‌ڕێنێ و هه‌واداران له ده‌وری یه‌كێتی میلـله‌تان و خۆشه‌ویستی و یارییه‌كی جوان كۆ بكاته‌وه.
جێی باسه هه‌ڵبژارده‌ی ئێران له كۆمه‌ڵه‌ی دووه‌می مۆندیال 3 خاڵی هه‌یه و دوای هه‌ڵبژارده‌ی ئینگلته‌ڕا كه 4 خاڵی هه‌یه، له ڕیزبه‌ندی دووه‌می هه‌ڵبژارده‌كان دێت، هه‌ڵبژارده‌ی ئه‌مه‌ریكایش 2 خاڵی هه‌یه و له ڕیزی سێیه‌مه و هه‌ڵبژارده‌ی ویڵزیش به خاڵێك له ریزی چواره‌م و كۆتاییه، به‌مه‌ش سه‌رجه‌م هه‌ڵبژارده‌كان هیوای سه‌ركه‌وتنیان بۆ قۆناغی 16 هه‌یه به‌و مه‌رجه‌ی بتوانن سه‌ركه‌وتن به‌ده‌ستبێنن.
کۆمێنت (0)
تا ئێستا هیچ کۆمێنتێک نەکراوە.