بۆ بەرپەرچدانەوەی هەر هێرشێكی چینی تایوان دەست بەمانۆری سەربازی دەكات

پەیامنێری ئاژانسی فرانس پرێس لە شوێنی مەشقەكەوە بڵاویكردەوە، دوای چەند ڕۆژێك لە مانۆڕە سەربازییە چڕەكانی چین، سوپای تایوان ئەمڕۆ سێشەممە دەستی بە مانۆڕێكی سەربازی بە تەقەی زیندوو كردووە.
گوتەبێژی سوپای هەشتەمی تایوان پشتڕاستی كردەوە كە مانۆڕەكان لە باشووری پارێزگای پینگتۆنگ بە تەقاندنی بڵێسەی ئاگر و تۆپخانە دەستی پێكردووە .
بەپێی ئاژانسی فرانس پرێس، سوپای چین گەورەترین مانۆڕی سەربازی لە مێژووی خۆیدا ئەنجامداوە، فڕۆكە و كەشتی جەنگی و مووشەكی بالیستیكی كۆكردۆتەوە، لە چوارچێوەی ئەوەی كە شرۆڤەكاران بە هاوشێوەكردنی گەمارۆ و لەشكركێشی تایوانیان زانیوە.
جێگای ئاماژەیە پەكین سەردانەكەی چەند رۆژی رابردووی پیلۆسی ئیدانە كرد كە باڵاترین بەرپرسی هەڵبژێردراوی ئەمریكایە بۆ سەردانی تایوان لە ماوەی 25 ساڵدا، هەروەها زنجیرەیەك دانوستان و رێككەوتنی هاریكاری لەگەڵ واشنتۆن هەڵپەسارد بە تایبەت لە بوارەكانی گۆڕانی كەشوهەوا و بەرگری.