شاعیری جوان پەرست و وڵات خۆشەویست، مامۆستا هێمن لەدیدارێكدا دەڵێت ( هەموو هونەرمەندێك پێشمەرگەیە) (1).
بەڵام كام هونەرمەند..؟! ئەو هونەرمەندەی لەدەستپێكی كارە هونەرییەكانیەوە، خۆیی و هونەرەكەی بۆ گەلەكەی تەرخان كردبێـت و لەخۆشیی و ناخۆشییەكاندا لەبەرەو ئامێزی گەلەكەیدا بووبێت،بەدرێژایی شۆرشەكانی كورد دژی داگیركەرانی كوردستان، زۆر هونەرمەندمان هەبووە لە هەرچوارپارچەكەی كوردستان كە هونەرەكەیان ڕەنگدانەوەی ئەو ئازار و مەینەتی و زوڵم و ستەمانە بووە كەڕووبەڕووی گەلەكەی بۆتەوه، یەكێك لەو هونەرمەندانەی كەلەبەشێكی كوردستاندا، كورد خاوەنی ناسنامەو تەنانەت خاوەنی زمان و فەرهەنگ و كەلتووری خۆشیی نەبووە بەهۆی سیاسەتی داگیركەری كوردستانەوە لێی زەوت كراوە، دەنگ و تەنبوور و سترانە شۆڕشگێڕی و نیشتماپەرییەكانی كردە مەشخەڵێك و بەرەنگاربوونەوەی ئەو سیستەمە چەوسێنەرە ،
هونەرمەند سەعید گاباری ، خاوەنی نازناوی ( بولبولی وڵات) لە ڕۆژئاوای كوردستانەوە بە ستران و لاوكە سیاسی و فۆلكلۆریی و ئەوینداریی و خۆشویستنی بۆ كوردستان، دەنگی هەڵبڕیوەو لە هەرچوار پارچەكەی كوردستان و تەواوی ئەوروپاو وڵاتانی ئاسیا، ئازار و ستەم و خەمی نەتەوەكەی لەڕێی هونەرەكەیەوە گەیاندۆتە ئەوانەی كە لەئازار و خەمی نەتەوەیەكی بندەست تێدەگەن.
لەكاروانی هونەری مۆسیقا و گۆرانی نەتەوەكەماندا چەندهونەرمەندێك بوونیان هەبووە، لەجوانترین نیعمەتەكانی پەروەردگار كە بەمرۆڤی بەخشیوە ( چاو) ە ، ئەوان لێی بێبەش بوون، لەتروسكایە ڕۆشنەكانی دڵەوە لە ژیان و لەهونەر و خەم و خۆشییەكانیان ڕوانیوە ، ئەو هونەرمەندە نابینایانە وەك ( حەسەن جزیری ، نوری باریكەیی ، عەینەدین ، سابیر كوردستانی و سەعید گاباری) بەڵام مێژوویەكی لێوانلێو له تێكۆشان و‌بەخششی هونەری بۆخۆیان تۆماركردووە و خزمەتێكی زۆریان بەهونەری مۆسیقا و گۆرانی نەتەوەكەیان كردووە.
محەمەد سەعید ئیسماعیل سڵێمان ، ناسراو بە هونەرمەند( سەعید گاباری) لەڕێكەوتی ( 24/3/1956) لەخانەوادەیەكی هەژاری زەحمەتكێشی جوتیار لە گوندی ( خربێ كەژێ) لەڕۆژهەڵاتی شاری ( عامودا) ی سەربەپارێزگای ( حەسەكە) ی ڕۆژئاوای كوردستان لەدایكبووە.
لەبنەڕەتدا باب و باپیرانی خەڵكی ( شنگال) و لەعەشرەتی( گابار) بوون ، ڕۆشن نییە بەچ هۆكارێك شنگال یان بەجێهێشتووە و ڕوویان كردۆتە ڕۆژئاوای كوردستان و لەگوندی ( خربێ كەژێ) نیشتەجێ بوون.
باوكی گەورەی گوند و خاوەنی دیوەخان بووە، بەردەوام دیوەخانەكەی جێی میواندۆستی و پشوودانی سترانبێژ و لاوكبێژەكانی كوردستان بووە و بەدەنگە خۆشەكانیان لاوك و سترانی خۆشییان چریوە، دایكی هونەرمەند كابانی ماڵ و، حەزێكی زۆری هەبووە بۆ بیستنی لاوك و ستران ، هەرلاوك و سترانێك لەدیوەخانی ماڵەكەیاندا خوێندرابێت، ئەم خاتوونە بەعەشقێكی زۆرەوە لەسینەیدا هەڵیگرتووەو لەبەری كردووە، ئەو دایكە ماندووە زەحمەتكێشە، چێژوەرگرە لە ستران و لاوك ، هەرچییەكی بیستووەولەبەری كردووە ، سەعیدی كوڕی فێركردووەبەهەمان میلۆدی تێكستەوە، لەتەمەنی (5) ساڵیدا ( سەعید گاباری) توانای چڕینی ستران و لاوكی هەبووە و بەدەنگی خۆشیی سەرنجی گوێگرانی ڕاكێشاوە و چێژیان لێوەرگرتووە.
هونەرمەند لەساڵی (1964) واتە لەتەمەنی (8) ساڵیدا بەهۆی نەخۆشییەوە چاوەكانی لەدەست دەدات، ئەوەش بێبەشبوونی هونەرمەندە لەو نیعمەتە جوانەی پەروەردگار بەمرۆڤی بەخشیوە، بەڵام توانا و زیرەكی لەڕێی هەستەكانیەوە جگە لەبینین لەبیرو هۆشیی هونەرمەند سەعید گاباریدا چڕتردەبنەوەو نائومێد نابێت لەژیان وەكو كەسێكی ئاسایی ژیانی ڕۆژانەی بەڕێ دەكات.
گوندی(كەرزین) یەكێك لەو گوندانەی نزیك بەزێدی هونەرمەند سەعید گاباری بووە، ئەو گوندە زۆر لەكەسایەتی ڕۆشنبیر و مامۆستا و شاعیری تێداهەڵكەوتووە، سەعید گاباری هاتووچۆی گوندی (كەرزین ) و لەوێ ئاشنایەتی لەگەڵ مامۆستا و شاعیر( هادی پەهەلەوی) دەكات .
شاعیر هادی پەهلەوی درك بەتوانا و دەنگخۆشیی هونەرمەند دەكات و، دەبێتە ڕێنیشاندەر و هاوكار و دڵسۆزو خەمخۆر بۆ هونەرمەند سەعید گاباری، هەوڵی لەگەڵدا دەدات و فێری بنچینەكانی سترانچڕین و ناساندنی بەهۆنراوەو هەڵبژاردنی هۆنراوەی بەنرخ ، هەروەها فێری ژەنینی ئامێری( تەنبور) ی دەكات، هادی پەهلەوی لەدەستپێكی كاری هونەری دا (3) هۆنراوەی خۆی دەدات بە گاباری ، هەروەها بەچەند شاعیر و كەسایەتی و هونەرمەندانی دەڤەرەكەی دەناسێنێ، شاعیرانی وەك ( جگەر خوێن و سەیداتیرێژ لەساڵی (1966) ، هونەرمەندانی وەك محەمەد شێخۆ ، سەعید یوسف و مەحمود عەزیز).
هونەرمەند سعید گاباری بەرەو دنیایەكی دیكە هەنگاو هەڵدەگرێ و پاشخانی خۆیی لەبواری ناسینی فەرهەنگ و كەلتوور و هونەر پەیدادەكات ، لەپاڵ ئەمانەشدا درك بە چەوساندنەوەی چینایەتی و نەتەوایەتی بەرامبەر بەنەتەوەكەی دەكات ، ئەمانە هەمووی لەهزر و بیریدا كۆیان دەكاتەوە و لەڕێی دەنگ و هونەرەكەیەوە بەستران و لاوكە هەست بزوێنەكانیەوە پێشكەشی گەلە چەوساوەكەی دەكات.
ناو و بەهرەی دەنگخۆشیی هونەرمەند سەعید گاباری بەناو گوند و تەواوی دەڤەرەكەیدا بڵاودەبێتەوە تادەگاتە باژێڕی ( حەسەكە) ، لەو باژێڕەدا مامۆستایەكی عەرەبی میسری گوێبستی ئەو ناوە دەبێت، دەچێتە گوندی (خربێ كەژێ) و خۆی دەگەیەنێته لای باوكی هونەرمەند و داوای لێدەكات كە ڕێگە بەكوڕەكەی بدات بچێتە وڵاتی میسر ، لەزانكۆی ( ئەزهەر) وانەی ئایینی بخوێنێ ، لەبەرئەوەی دەنگی خۆشەو بۆ خوێندنی قورئان شیاوە.
كاتێك ئەو هەواڵە دەگاتە ( جگەرخوێن و سەیدا تیرێژ) ئەوانیش بەباوكی هونەرمەند دەڵێن ، كوڕەكەی تۆ زۆر دەنگی خۆشەو لەدوارۆژدا دەبێتە هونەرمەندێكی سەركەوتوو،
( سەعید سڵێمان) ی باوكی هونەرمەند ڕای هەردوو شاعیر پەسەند دەكات و ڕێگای هونەر و خوێندنی ستران و لاوكی لەبەردەمدا فراوانتر و ڕۆشنتر دەكات.
هونەرمەند سەعید گاباری لەتەمەنی دە ساڵیدا بەگۆرانی و سترانی نیشتمانی و فۆلكلۆری لە قامشلۆ و عامودا و حەسەكە خۆی دەناسێنێ و گوێگران بەدەنگ و تێكست و میلۆدییە خۆشەكانی سەرسام دەبن، بەڵام دەرفەتی بۆناڕەخسێت گۆرانیەكانی تۆماربكات تاساڵی (1969) یەكەم گۆرانی و بەرهەمی خۆی لەسەركاسێت تۆماردەكات، یەكێك لە سترانە بەناوبانگەكانی كەلەهۆنراوەی ( سەیدا تیریژ ) بووە بەناوی ( بولبولی دڵشاد) لەڕێی ئەو گۆرانییەوە دەنگ و هونەرەكەی بەتەواوی شارەكانی ڕۆژئاوای كوردستان دا بڵاو دەبێـتەوە.
هونەرمەند سەعیدگاباری بەهونەرمەندێكی شۆڕشگێڕو تێكۆشەری ڕێگای ڕزگاریخوازی كوردستان ناسراوە، دەنگ و هونەر و تەنبوورەكەی لەخزمەتی شۆرش و پێشمەرگە دابووە و، خاوەنی گەنجینەیەكی بەنرخی گۆرانی فۆلكلۆری بووە، لەپاڵ خوێندنی ئەو ستران و لاوكانەی دەڤەرە جیاجیاكانی كوردستان، سترانی ئەوینداری و سۆزداریشی فەرامۆش نەكردووە.
ڕۆژ بەڕۆژ ستران و لاوكە سیاسیەكانی هەست و بیر و هۆشیی خەڵكی چەوساوە و بندەستی كوردانی ڕۆژئاوای دەبزواندوو ، وڵات و نیشتمانی لەلا زیاتر خۆشەویست دەكردن، لەبەرامبەردا ڕژێمی بەعسی سوریای عەرەبی دەكەوێتە ڕاوەدوونان و گرتن و ئازاردانی جەستەیی و دەروونی ئەو هونەرمەندە بوێرەی كورد، لەساڵی (1978) هونەرمەند سەعید گاباری ڕۆژئاوای كوردستان جێدێڵێت و ڕوودەكاتە شاری هەولێر لەباشووری كوردستان، بەرلەوەی بەجەستە بێتە باشوور پێشتر دەنگ و هونەرەكەی لەلای گوێگران و هەوادارانی هونەری شۆرشگێڕی و بەرگری لەوڵات ئاشنا بوو، دوای ماوەیەك مانەوە ڕوودەكاتە شاری بەغدا و ماوەیەك لەڕادیۆی كوردی بەغدا لەگەڵ هونەرمەندان ( محەمەد عارف جزیری ، تەحسین تەها ، عائیشە شان و فوئاد ئەحمەد) كاری هونەری ئەنجام دەدات ، لەساڵی (1979) جارێكی دیكە دێتەوە شاری هەولێر و پەیوەندی بە ( تیپی هونەری میللی هەولێر ) دەكات و لەگەڵ هونەرمەندان ( شێرزاد سەرسپی و سابیر عەبدولڕەحمان و حەمە جەزا و...تاد) كۆمەڵێك هونەرمەندی شاری هەولێر كاردەكات.
لەڕۆژئاوای كوردستان لەبەر ترس و گرتن و ستەمی بەعسی سوریا، ڕووی كردە باشوور و لێرەش بەهەمان شێوە لەبەر ڕەفتارە دڕەندەكانی بەعسی عێراقی ئەم خۆشخوان و كوردپەروەر و عاشق بە خاك و نیشتمان و دڵسۆز بۆ هونەرەكەی ناهێڵن پشووبدات و لاوك و سترانەكانی بخوێنێ ، ڕژێمی بەعسی لێ ئاگادار دەكەن، چیتر سەعید گاباری ناتوانێ لەناو هاوزمانەكانی خۆیی لەشاری هەولێر درێژە بەژیان و كارە هونەرییەكانی بدات ناچار لەبەر دەربازكردنی گیانی خۆی ڕوو دەكاتە شاخ ، ( لە 14/6/1981 لەهەولێر كەشف بووم كە من لە ڕۆژاوای كوردستانەوە هاتووم و لێرە كاری هونەری دەكەم ، ناچار ڕووم كردە شاخ و بووم بەپێشمەرگە ) (2) .
لەناو ڕیزەكانی پێشمەرگە هونەرمەند ئازادانەو بویرانە دەنگ و سۆزی شۆرشگێڕی هەڵدەبڕێت و ستران و لاوك بۆ جوانی كوردستان و قارەمانێتی و نەبەردی پێشمەرگە دەخوێنێ ، سەعیدگاباری هونەرمەندێكە لەگەڵ تەنبوورەكەی هەرچوارپارچەكەی كوردستان گەڕاوەو ، پاشخانی هونەری خۆی پێ دەوڵەمەندكردووە و ، لەسەر ئەو ڕێبازە تێكۆشاوە كە دەبێت هونەرمەندی كورد خاوەنی دوو پەیام بێت و كاری بۆبكات، پەیامێكی مرۆیی و پەیامی سیاسی كەبۆ بەرژەوەندی گەلەكەی بێت و ، دەبێت هونەرەكەی هەڵقوڵاوی ناوخەڵكی ستەمدیدەی كوردستان بێت ( من دەمەوێت لەڕێی دەنگ و هونەرەكەمەوە ئازاری خۆم و دبێژم ، من هیچ كات بازرگانیم بەهونەرەكەمەوە نەكردووە، ژانی دڵی خۆم ، نابینایی خۆم و ئازاری میللەتەكەم دبێژم )(3).
لەسەردەمی پێشمەرگایەتیدا بوونی خۆی دەسەلمێنێ و هەرزۆر زوو دەبێتە كەسێكی خۆشەویستی نێو هاوڕێكانی و لەوكاتەدا لەگەڵ پێشمەرگەو هونەرمەندی سەرنگومكراو ( ئەردەوان زاخۆیی) دەبنە دوو هاوڕێی گیانی بەگیانی و پێكەوە خۆیان لەهونەری بەرگریدا دەبیننەوە و پێكەوە لەڕێكەوتی ( 15/5/1983) ئەو سترانە دەخوێنن و لەڕادیۆی شۆڕشەوە بڵاودەكرێتەوە
( دایە ئەزم د جەنگم ، پێشمەرگەیەكی چەلەنگم
چەكی من ملانە ، دیلان دەنگی توپانە
د چی یا ئەز كەلینم ، ب دوژمنێ حەلینم
گەرشەهید بووم خۆڕاگرە ، دایە ئەز پێشمەرگەمە) .
لەسەرەتای ساڵی نەوەدەكانی سەدەی پێشوو، هونەرمەند سەعید گاباری ڕوودەكاتە هەندەران و لەوڵاتی ( ئەڵمانیا) وەك پەنابەر دەمێنێتەوە، لەهەندەرانیش زۆر چالاكانەدرێژە بەكاروانە هونەرییەكەی دەدات ، لەتەواوی وڵاتانی ئەوروپا و ئاسیا، بەهەستێكی كوردانەو نیشتمانپەروەرانەوە لەهەموو بۆنە نەتەوایەتی و نیشتمانیەكان و ئاهەنگەكان بەشداریكردووە.
هونەرمەند لەدەستپێكی كاری هونەرییەوە زۆر گرنگی داوە بە ژیاندنەوەی گۆرانییە فۆلكلۆرییەكان ، بەڵام لەم قۆناغەی ژیانی هونەری لەهەندەران، جیا لەگۆرانییە نیشتمانیەكانی گرنگییەكی زیاتری داوە بەزیندوو كردنەوەی گۆرانییە فۆلكلۆرییەكان ، دیارە هونەرمەند مەبەستی بووە لەدیدارێكدا دەڵێت ( چەندین ساڵ لەمەوبەر دەستم بە گۆرانی فۆلكلۆر كرد ، لەبەرئەوەی لە دهۆك لەزاخۆ ، لەقامشلۆ ، گۆرانیبێژەكانمان دەچوونە داوەت و ئاهەنگەكان ، تاگۆرانییەكی كوردییان دەگووت، چوار گۆرانی عەرەبی و پێنج گۆرانی توركی یان دەگووت، خەریك بوو هێدی هێدی ئەو گۆرانیانە بمرن ، منیش وەك ئەركێكی نەتەوەیی بەپێویستم زانی و هەوڵمدا (3600) گۆرانی فۆلكلۆریم لەفەوتاندن ڕزگار كرد ، من زۆر زەحمەتم دی و چەشت ، من وەك هونەرمەندێك و پێشمەرگەیەك خۆم بەخەمخۆری میللەتەكەی خۆم دەزانم ، بۆیە ئەوكارەم كرد تا هونەرمەندەكانمان لەگوتنی گۆرانی عەرەبی و توركی دووربكەونەوە) ( 4).
لەدوای گەران و بەدواداچوون سەبارەت بە ژیان و كارە هونەرییەكانی هونەرمەند سەعید گاباری، لەوسەرچاوانەدا ئاماژە بە ( 4712) گۆرانی و لاوك دەكرێت لەماوەی نیوسەدەی ژیانی ستران و لاوك چرینی هونەرمەند سەعید گاباری ، سوودی لە هۆنراوەی شاعیران ( جگەرخوێن ، هادی پەهلەوی و سەیدا تیرێژ) وەرگرتووە، خودی هونەرمەند نایشارێتەوەو و زۆر بەڕاشكاوی وتویەتی ( من دروستكراوی ئەم كەسایەتیانەم ، جگەرخوێن ، سەیداتیرێژ ، هادی پەهلەوی و عوسمان سەبری ، زۆر هاوكار و یارمەتیدەرم بوون) .
هونەرمەند جگە لەزمانی دایكی كەزمانی شیرینی كوردیە، زمانی ئینگلیزی و فەڕەنسی و عەرەبی و فارسیشی زانیوە، لەباری كۆمەڵایەتیەوە خاوەنی هاوسەر و (8) منداڵە.
هونەرمەند سەعید گاباری لەقۆناغە جیاوازەكانی شۆڕشی كورد دا ڕۆڵی بەرچاوی هەبووەو ماوەی نیوسەدە لەڕێی دەنگ و هونەر و هەستە نەتەوەیی و نیشتمانییەكەیەوە خزمەتی بەگەل و نەتەوەكەی كردووە ، لەبەر ئەو هەڵوێستە نەتەوەییەوە لەلایەن دوژمنانی كوردەوە ڕووبەڕووی گرتن و ئازار و ئەشكەنجە بۆتەوە، دەنگ و هونەری شۆرشگێڕیی سەعید گاباری كاریگەری زۆری هەبووە لەسەر بەرزكردنەوەی وورەی هێزی پێشمەرگەو خەڵك لەبەرامبەر دوژمنە سەرسەختەكانی گەلی كورد.
هونەرمەند زۆر عاشق بەخاك و فەرهەنگ و هونەر و زمانی نەتەوەكەی بووە، زۆرینەی بەرهەمەكانی شۆڕشگێری و ئازار و مەینەتییەكانی نەتەوەكەی تێدا بەرجەستەكردووە .
هونەرمەند سابیر كوردستانی ، یەكێك لەبەرهەمەكانیدا تەمەننای ئەوەی كردووەكە كە چاوێكی هەبووایە وەسفی مەعشوقەكەی خۆی پێبكردایە ، لەبەرئەوەی هەردوو هونەرمەند ( سابیر كوردستانی و سەعید گاباری) خاوەنی هەمان ئازاربوون و لە بینینی سرووشت و یارەكەیان بێ بەشبوون، هونەرمەند سەعید گاباری بەزاراوەی سۆرانی هەمان میلۆدی هونەرمەند سابیر كوردستانی دەخوێنێ ، بەڵام لەبەرئەوەی مەعشوقەكەی هونەرمەند سەعید گاباری وڵات و نیشتمانی جوانی كوردستانە ، بەدەنگ و سۆزێكی خۆش دەڵێت :
( خۆزگە لەم دنیایەدا ئاواتم ئەهاتە دی
ئەو كەسەی كوردپەروەربێ تێ دەگا من دەڵێم چی ..!
خۆزگە لەم دنیایەدا یەك چاوێكم هەبووایە ..!
وەصفی جوانی ئەم خاكەم بەدڵی خۆم بكردایە
وەصفی داروبەردی كوردستانم بەدڵی خۆم بكردایە ) .
سەعیدگاباری جیا لەهونەری دەنگبێژی و ژەنینی تەنبوور ، ماوەی چەند ساڵێك وەك پێشكەشكاری بەرنامەی هونەری لەكەناڵی ئاسمانی كوردستان كاری كردووە ، هەروەها هەموو ڕۆژانی دووشەممەیەك لەڕادیۆی ( نەورۆز) پێشكەشكاری بەرنامەی ( كەلەپوور بۆ هەمووان) لەئامادەو پێشكەشكردنی خۆی بووە، لەوبەرنامەیەدا هونەرمەند مەبەستی بووە گەڕان و لێكۆلینەوەلەسەر كەلەپوور بكات لەهەموو ناوچەو دەڤەرە جیاوازەكانی كوردستان بكات.
هەرچەندە بەر‌هەمە هونەرییەكانی گەلێك زۆرن خەرمان بەركەت ، وا لێرەدا بەشێك لە ستران و لاوكەكانی هونەرمەند دەخەمە ڕوو ( بولبولی دڵشاد ، لێ دایە ، دەرسیم ، كوبارێ ، لێ لێ جوانێ ، كەچەلو ، دەروێش عەبدی ، لاوكی ئێمە، خوزیا من و تە ناس كریبا ، دیلانا شێخانێ ، خوش بوهار ، دیلانا كوركانجێ ، كوچەرێ ، ئاگری ئەڤین ، شیرینا من ، دلبەر ، بێژە لاوكۆ ، لێ لێ ڕەبەنێ ، پێشمەرگە ، فەلەك دەستێ خۆنەدا ....تاد) .
لەوتەمەنە هونەرییە هەورازو نشێوە پڕبەخششەدا، هونەرمەند كاری هونەری لەگەڵ چەندین هونەرمەندی دەنگخۆش و دەنگ زوڵاڵ ئەنجامداوە وەك ( ئەردەوان زاخۆیی ، حەسەن عەلی خەنجەر ، دەلیل سڵێمان ، سەربەست مەڵاتی، حەسەن شەریف ، بڵندئیبراهیم ، خدر فەقیر و حوسێن عومەر ) .
ئەم هونەرمەندە كوردپەروەر و دڵسۆزی هونەر و پێشمەرگەو خاكی پیرۆزی كوردستان ، لەناوەڕاستی مانگی چواری ساڵی (2020) باری تەندروستی تێكدەچێت،لەیەكێك لەنەخۆشخانەكانی شاری هەولێر ، بۆماوەی (20) ڕۆژ لەژێر چارەسەر و چاودێری پزیشكیدا دەمێنێتەوە، بڕیاردەدەرێت ئەو هونەرمەندە شۆڕشگێڕە ڕەوانەی وڵاتی ئەڵمانیا بكرێت بۆ مەبەستی چارەسەركردن، بەڵام بەداخەوە مەرگ بواری نادات و لەكاتژمێر (4:30) خولەكی بەرەبەیانی ڕۆژی دووشەممە ، ڕێكەوتی (4/5/2020) بەنەخۆشیی ( شێرپەنجەی سییەكان) چاوەكانی بۆهەمیشە لێك دەنێ و ماڵئاوایی لەژیان و هونەر و پێشمەرگەو خاكی كوردستان دەكات، لەسەر بڕیار و وەسیەتی خۆی ، داوای كردووە تەرمەكەی لە گۆڕستانی ( مەلا ئۆمەر) ی شاری هەولێر بنێژن، گڵكۆی ئەو هونەرمەندە نابینایە ، بەڵام لەبەخشش و چالاكی هونەری سترانی شۆرشگێڕی و ئەوینداریدا دەوڵەمەندلە گۆڕستانی مەلائۆمەر ئەسپەردەی خاكی پیرۆزی كوردستان كراوە ،
هونەرمەندێك كەهەموو تەمەنی بەخشی بەهونەر و بزاڤی نەتەوەكەی چۆن دەمرێ خاوەنی ئەو هەموو خەسڵەتە جوامێریی و هەستە بەرزەی كوردایەتی بێت،بۆهەمیشە ناو دەنگ و هونەرەكەی لەخانەی هونەری بەرگری و ئەوینداری و سۆز و خۆشەویستی بۆ نیشتماندا بەپیرۆزی دەمێنێتەوە، هونەرمەند ئەو هەستە بەرزەی بەمەقامی بەیات بە زاراوەی سۆرانی خوێندووە و دەڵێت :
( بستێك لەخاكی وڵاتەكەم بەهەموو زێڕو ماڵی دنیا نایگۆڕم
هەست و بیر و باوەڕی كوردایەتیم بەهیچ هەست و بیرێك نایگۆڕم
لەوڕۆژەی بیرم كردووە لەژیان و خۆم دەناسم
كەكوڕی كوردستانی پیرۆز و كوڕی دلێرم
ئەمن ڕۆژێك لەڕۆژان ، ڕووی خۆم
لەگوللەی تفەنگی دوژمنان لانادەم و نایگۆڕم
لەڕۆژی مەرگم ، ناوی كوردستان بەتیپی گەورە بنووسن لەسەر گۆڕم
لەڕۆژی ڕزگاركردنی كوردستانە جوانەكەم ،
كچ و كوڕ بە دەهۆڵ و زوڕنا مزگێنی و مژدە بێنن لەسەر گۆڕم
بڵێن هەستە ئەی مردیی ، كوردستانە جوانەكەت ڕزگاربوو
كۆڵانی شارەكانت پڕی گوڵاڵەی نەخشینی زەردو سۆرن ).
سڵاو و دروود بۆ كەسایەتی و هونەری بەرزی سەعید گاباری یاد و یادەوەرییەكانی بەرزو بەڕێزبێت .
جەمالی دەلاك (11/4/2022) هەولێر.
سەرچاوە :
(1) دیداری هەردوو هونەرمەند ( ناسری ڕەزازی و نەجمەدینی غوڵامی) لەگەڵ مامۆستا ( هێمن) ، ساڵی (1982) گوندی شیلاناوێ.
( 2و3 و 4) دیدار لەگەڵ هونەرمەند سەعید گاباری ، ڕادیۆی ڕووداو بەرنامەی ( ژیان و هەڵبەست ) (8/6/2017).
کۆمێنت (0)
تا ئێستا هیچ کۆمێنتێک نەکراوە.