گوته‌بێژی ته‌ندروستی كۆیه ڕایگه‌یاند، ئه‌مڕۆ دووشه‌م به‌هۆی شه‌پۆڵه‌كانی خۆڵبارین و ته‌نگه‌نه‌فه‌سییه‌وه 45 هاووڵاتی شاری كۆیه سه‌ردانی نه‌خۆشخانه‌كانی فریاكه‌وتنیان كردووه.
هاوكار عه‌لی گوته‌بێژی ته‌ندروستی كۆیه بۆ (كوردستان تیڤی) ڕایگه‌یاند: به‌هۆی كاریگه‌ری ئه‌و شه‌پۆڵه خۆڵبارینه‌ی شاره‌كانی هه‌رێمی كوردستانی گرتۆته‌وه، ئه‌مڕۆ دووشه‌م له شارۆچكه‌ی كۆیه 45 هاووڵاتی سه‌ردانی به‌شی فریاكه‌وتنی هه‌ردوو نه‌خۆشخانه‌ی فێركاری شه‌هید د. خالید و نه‌خۆشخانه‌ی گشتی ته‌قته‌قیان كردووه.
ڕاشیگه‌یاند: هه‌موو ئه‌وانه‌ی سه‌ردانی نه‌خۆشخانه‌كانیان كردووه به‌هۆی شه‌پۆڵی خۆڵبارینه‌وه تووشی حاڵه‌تی ته‌نگه‌نه‌فه‌سی و هه‌ستیاری بوونه‌ته‌وه.
هه‌روه‌ها ڕایگه‌یاند: به‌شی زۆری ئه‌وانه‌ی سه‌ردانی نه‌خۆشخانه‌كانیان كردووه، چاره‌سه‌رییان پێدراوه و ڕه‌وانه‌ی ماڵه‌وه كراون.
جێی باسه له به‌ره‌به‌یانی ئه‌مڕۆ دووشه‌مه‌وه شه‌پۆڵێكی چڕی خۆڵبارین ناوچه‌كانی هه‌رێمی كوردستان و پارێزگاكانی عێراقی گرتۆته‌وه، كه‌شناسیش پێشبینی كردووه شه‌پۆڵه‌كه تا سبه‌ی سێشه‌میش به‌رده‌وامی هه‌بێت.
په‌یامنێر: كانیاو حه‌كیم
کۆمێنت (0)
تا ئێستا هیچ کۆمێنتێک نەکراوە.