سێ تاوانبار له‌ به‌غدا دزییان کردبوو له‌ سلێمانی ده‌ستگیرکران

پۆلیسی سلێمانی ده‌ستگیركردنی سێ تۆمه‌تبار ڕاده‌گه‌یه‌نێ كه‌ پیشتر له‌ شاری به‌غدا به‌ تۆمه‌تی دزیكردن فه‌رمانی گرتنیان بۆ ده‌رچووبوو.

بەڕێوەبەرایەتی پۆلیسی پارێزگای سلێمانی بڵاوی كرده‌وه‌: مەفرەزەكانی بنكەی پۆلیسی سەرچناری سەربەبەشی پۆلیسی ناوشار/ڕۆژئاوا، سێ‌ تۆمەتباریان دەستگیركرد كە فەرمانی گرتنیان هەبووە لە دادگای استیئنافی بغداد–رصافە .

پۆلیسی سلێمانی ڕاشیگه‌یاند‌: دوای ئەوەی فەرمانی گرتنی سێ‌ تۆمەتبار لە دادگای بەغدا گەیشتە پۆلیسی سلێمانی كە گومانیان دەكرا له‌ سلێمانی بن، بەڕێوەبەری پۆلیسی پارێزگای سلێمانی سەرجەم بەش و بنكەكانی سنووری بەڕێوەبەرایەتی ڕاسپارد بەدواداچوون و لێكۆڵینەوە بكەن بۆدۆزینەوە و دەستگیركردنی تۆمەتباران.

هه‌روه‌ها ڕایگه‌یاند‌: دوای لێكۆڵینەوەكان توانرا تۆمەتباران بدۆزرێنەوە و لەلایەن بنكەی پۆلیسی سەرچنارەوە دەستگیر بكرێن، تۆمه‌ته‌كانیشیان بریتتیه‌ له‌ دزینی بڕی 15 ملیۆن دیناری عیراقی و بڕێك ئاڵتوون .

پۆلیسی سلێمانی بڵاویشی كرده‌وه، ئێستا تۆمەتباران (ر ، أ ، ج - لەدایكبووی 1999) ، (م ، أ ، ج –لەدایكبووی 2000 ) و ( ع ، ع ، ع –لەدایكبووی 1976 ) بە بڕیاری دادوەر و بەپێی ماددەی 444 لە یاسای سزادانی عێراقی ڕاگیراون و دوای تەواوكردنی ڕێكارە یاساییەكان ڕەوانەی بەغدا دەكرێنەوە .