سه‌نته‌ری میدیا و زانیاری وه‌زاره‌تی پێشمه‌رگه بڵاوی كرده‌وه، ئه‌مڕۆ سێشه‌م هه‌ریه‌ك له لیوا روكن به‌ختیار محمد و عه‌مید روكن هه‌ژار عومه‌ر ڕاوێژكارانی باڵای وه‌زاره‌ت، پێشوازیان كرد له كۆلۆنێل تاد بۆرۆس جێگری راوێژکاری باڵای سه‌ربازیی هاوپه‌یمانی نێوده‌وڵه‌تی و وه‌فدێكی یاوه‌ری.
له كۆبوونه‌وه‌یه‌كدا تاوتوێی دواین په‌ره‌سه‌ندنه‌كانی پڕۆسه‌ی چاكسازی له وه‌زاره‌تی پێشمه‌رگه كرا و هه‌ردوولا به بایه‌خه‌وه له پێشكه‌وتنی ئه‌و پڕۆسه‌یان ڕوانی.
له به‌شێكی تری كۆبونه‌وه‌كه‌دا ڕاوێژكارانی وه‌زاره‌ت ڕۆڵی ڕاوێژكارانی سه‌ربازی هاوپه‌یمانانیان به‌رز نرخاند له پێشكه‌وتن و رێكخستنه‌وه‌ی پێشمه‌رگه، هیواشیان خواست ئه‌و هاوكاری و هه‌ماهه‌نگییه فراونتر بكرێت و به‌رده‌وامی هه‌بێت.
هه‌ر له‌و كۆبوونه‌وه‌یه‌دا به وردی باس له مه‌ترسییه‌كانی ئێستای تیرۆریستان كرا، بۆ ئه‌مه‌ش ڕاوێژكارانی هاوپه‌یمانان جه‌ختیانكرده‌وه له‌سه‌ر هاوكاریی و یارمه‌تییه‌كانیان بۆ پێشمه‌رگه له‌به‌رامبه‌ر پاراستنی ئارامی و ئاسایشی ناوچه‌كه و تێكشكانی ته‌واوه‌تی تیرۆریستان به‌رده‌وام ده‌بن.
له كۆتایی كۆبوونه‌وه‌كه‌دا پڕۆسه‌ی مه‌شق و ڕاهێنانه‌كانی پێشمه‌رگه و جێبه‌جێكردن و كاركردن له‌سه‌ر پڕۆژه ئاماده‌كراوه‌كانی وه‌زاره‌ت كرا به جۆرێك گونجاو بێت له‌گه‌ڵ خواسته‌كانی ڕیفۆرمی سه‌ربازی له وه‌زاره‌تی پێشمه‌رگه.
هاوکات گفتوگۆی چڕوپڕ لەبارەی دیاڵۆگی ستراتیژیی نێوان عێراق ـ ئەمریکا کرا.
کۆمێنت (0)
تا ئێستا هیچ کۆمێنتێک نەکراوە.