لە چامپیۆنس لیگ بایرن میونشن سەرکەوتنێکی گەورەی به‌سه‌ر دینامۆ کیڤ تۆمارکرد

 لە گەڕی دووەمی قۆناغی كۆمەڵەكانی چامپیۆنس لیگ و لە گڕوپی پێنجەمدا، یانەی بایرن میونشن سەركەوتنێكی گەورەی بەدەستهێناو بە پێنج گۆڵی بێ‌ بەرامبەر لە یانەی دینامۆ كیڤی میوانی بردەوە.
 یاریزانانی بایرن هەر لە سەرەتاوە چەندین هێرشیان كردە سەر گۆڵی میوانەكەیان و یەكێك لە هێرشەكانیش لێدانێكی سزای لێكەوتەوەو لە جێبەجێ‌ كردنی لێدانەكەدا، ڕۆبێرت لیڤاندۆڤسكی پۆڵەندی ئەستێرەو گۆڵكاری بایرن گۆڵێكی بۆ تیپەكەی لە خولەكی دوازدە تۆماركرد.
 پاشان هەمان یاریزان گۆڵی دووەمی خۆی و میواندارەكانی لە خولەكی بیستوحەوت بەدەستهێناو گێمی یەكەم بەم ئەنجامە تەواوبوو، لە گێمی دووەم و لە خولەكی شەستوهەشتدا، یاریزان سێرجی گنابری گۆڵی سێیەمی بایرنی تۆماركرد.
 دواتر لیرۆی سانێ‌ تیپە باڤاریەكەی لە خولەكی حەفتاوچوار كردە خاوەنی گۆڵی چوارەم، بەر لە كۆتاییهاتنی یاریش بە سێ‌ خولەك، هێرشبەری كامیرۆنی، ئێریك ماكسیم چۆپۆ گۆڵی پێنجەمی بایرنی تۆماركردو كۆتایی بە كەرنەڤالی گۆڵەكانی یاریەكە هێنا.
 بەم بردنەوەش كۆی خاڵەكانی بایرن لە پێشەنگی ڕیزبەندی گڕوپی پێنجەم بۆ شەش خاڵ بەرزبووەوەو دینامۆ كیڤیش بە تەنها خاڵێك لە پلەی سێیەمی ڕیزبەندی گڕوپەكە دێت.