وه‌زاره‌تی ته‌ندروستی ئیسپانیا ئه‌مڕۆ چوارشه‌م بڕیاری دا، دۆخی یارییه‌كانی خولی ئیسپانیا ئاسایی بكاته‌وه و ته‌واوی جه‌ماوه‌ران بگه‌ڕێنه‌وه نێو یاریگاكان بۆ بینینی یارییه‌كان.
ئه‌م بڕیاره‌ی وه‌زاره‌تی ته‌ندروستی ئیسپانیا له ڕۆژی هه‌ینی داهاتووه‌وه ده‌كه‌وێته بواری جێبه‌جێكردنه‌وه دوای ئه‌وه‌ی له مانگی ئاداری ساڵی 2020 به‌مه‌به‌ستی خۆپارێزیكردن له په‌تای كۆڕۆنا بڕیاری ئه‌نجامدانی یارییه‌كانی خولی ئیسپانیا به‌بێ جه‌ماوه‌ر درابوو.
له‌سه‌ره‌تای وه‌رزی ئه‌مساڵدا، یه‌كێتی تۆپی پێی ئیسپانیا ڕێگه‌ی دابوو به‌شێك له جه‌ماوه‌ران بێنه ناو یاریگه، دواتریش ڕێژه‌كه بۆ 60% به‌رز كرابووه‌وه.
وه‌زاره‌تی ته‌ندروستی ئیسپانیا ڕایگه‌یاند: سه‌باره‌ت به‌و یارییانه‌ی كه له‌ناو هۆڵه‌كان به‌ڕێوه ده‌چن وه‌ك چالاكییه‌كانی تۆپی سه‌به‌ته و تۆپی ده‌ست و ئه‌وانی تر، له مانگی داهاتوودا ڕێژه‌ی ئاماده‌بوونی جه‌ماوه‌ر له‌نێو هۆڵه‌كان بۆ 80% به‌رز ده‌كه‌ینه‌وه، له كاتێكدا كه ئێستا ڕێژه‌كه 40%ه.
کۆمێنت (0)
تا ئێستا هیچ کۆمێنتێک نەکراوە.