وه‌زاره‌تی ته‌ندروستی هه‌رێمی كوردستان ئاشكرای كرد، له ڕێگه‌ی ده‌زگای خێرخوازیی بارزانی و له‌لایه‌ن ده‌سته‌ی فریاگوزاری كوێتی بڕی دوو ملیۆن دۆلاریان بۆ دابینكردنی ئامێر و پێداویستییه پزیشكییه‌كان پێ به‌خشرا.
وه‌زاره‌تی ته‌ندروستی هه‌رێمی كوردستان بڵاوی كرده‌وه: ئه‌مڕۆ دووشه‌م لە ئۆفیس و کۆگاکانی دەزگای خێرخوازیی بارزانی و بە ئامادەبوونی بەڕێزان د. سامان بەرزنجی وەزیری تەندروستی و عومه‌ر كه‌نده‌ری كونسوڵی گشتیی دەوڵەتی كوێت و ئومێد خۆشناو پارێزگاری هەولێر و مووسا ئەحمەد سەرۆكی دەزگای خێرخوازیی بارزانی، مەڕاسیمێکی گرینگ ڕاگەیەنرا بۆ مه‌به‌ستی دابینكردنی ئامێر و پێداویستی پزیشكی به بڕی نزیکەی دوو ملیۆن دۆلار.
وه‌زاره‌تی ته‌ندروستی هه‌روه‌ها بڵاوی كرده‌وه: ئه‌و بڕه پاره‌یه بۆ دابینكردنی ئامێر و پێداویستی پزیشكی بۆ هۆڵەکانی نەشتەرگەری و چاودێری چڕ ده‌بێت.
جه‌ختیشی كرده‌وه كه پاره‌كان لە ڕێگەی دەزگای خێرخوازیی بارزانی و لەلایەن دەستەی فریاگوزاری كوێتی بەخشراوە و ڕادەستی وەزارەتی تەندروستی حكوومەتی هەرێمی كوردستان کران.
کۆمێنت (0)
تا ئێستا هیچ کۆمێنتێک نەکراوە.